(ប៉ារីស)៖ អ្នកគាំទ្រក្រុមជម្រើសជាតិបារាំងពីរនាក់ ត្រូវបានគេរាយការណ៍ថា បានស្លាប់នៅអំឡុងពេលនៃពិធីអបអរសាទរ ជ័យជម្នះក្នុងការប្រកួតព្រឹត្តិការណ៍បាល់ទាត់ World Cup ឆ្នាំ២០១៨ លើក្រុមជម្រើសជាតិក្រូអាត ៤ ទល់នឹង ២ នៅវគ្គផ្ដាច់ Final។ នេះបើតាមការចេញផ្សាយដោយសារព័ត៌មាន Sputnik នៅថ្ងៃចន្ទ ទី១៦ ខែកក្កដា ឆ្នាំ២០១៨។
កាលពីថ្ងៃអាទិត្យ ក្រុមជម្រើសជាតិបារាំងបានក្លាយជាជើងឯក World Cup ជាលើកដំបូងរយៈពេល ២០ឆ្នាំ ក្រោយធ្លាប់បានគ្រងជើងឯកនេះកាលពីឆ្នាំ១៩៩៨ ក្នុងនាមជាម្ចាស់ផ្ទះ។ ចំណែកឯក្រុមអ្នកគាំទ្រ បាននាំគ្នាចុះតាមដងផ្លូវដើម្បីអបអរជ័យជម្នះនេះភ្លាមៗ ប៉ុន្តែស្របពេលសប្បាយរីករាយ មនុស្សពីរនាក់ត្រូវបានគេរាយការណ៍ថា បានស្លាប់ ហើយអំពើហិង្សាក៏បានផ្ទុះឡើងនៅចំកណ្ដាលទីក្រុងប៉ារីសផងដែរ។
ជាមួយគ្នានោះដែរ បើតាមសារព័ត៌មាន The Mirror អ្នកគាំទ្រជម្រើសជាតិបារាំងម្នាក់អាយុ ៥០ឆ្នាំ បានបាក់កស្លាប់បន្ទាប់ពីរូបគេលោតចូល ប្រឡាយទឹកមួយក្នុងទីក្រុង Annecy នៅពេលក្រុមមាន់គកបារាំងទទួលបានជ័យជម្នះ ខណៈអ្នកគាំទ្រម្នាក់ទៀតបានស្លាប់នៅ ក្នុងគ្រោះថ្នាក់ចរាចរណ៍បើករថយន្ដបុកដើមឈើ ដែលត្រូវបានគេជឿជាក់ថា ដោយសារតែអបអរជ័យជម្នះដូចគ្នា៕
