(តូក្យូ)៖ ខណៈទឹកជំនន់ស្រកចុះ និងអាកាសធាតុចាប់ផ្តើមប្រសើរឡើងវិញ ក្រោយពីរយៈពេលមួយសប្តាហ៍ នៃគ្រោះទឹកជំនន់ដ៏មហាប្រល័យ នៅតាមបណ្តាខេត្តភាគខាងលិចប្រទេសជប៉ុននោះ លោកនាយករដ្ឋមន្ត្រី ស៊ីនហ្សូ អាបេ បានប្តេជ្ញាធរថា នឹងបង្កើនថវិកាជំនួយសម្រាប់ស្រោចស្រង់តំបន់រងគ្រោះទាំងអស់ឡើងវិញ ខណៈចំនួនមនុស្សស្លាប់គិតត្រឹមល្ងាចថ្ងៃសុក្រនេះគឺជាង ២០០នាក់ និងរាប់សិបនាក់ទៀតបន្តបាត់ខ្លួន។ នេះបើតាមការចេញផ្សាយដោយ ស៊ីនហួរ នាល្ងាចថ្ងៃសុក្រ ទី១៣ ខែមិថុនា ឆ្នាំ២០១៨។
សម្រាប់ជំនួយដែលមានស្រាប់ទៅហើយ ដែលត្រូវបានបញ្ចេញដោយរដ្ឋាភិបាលនោះ គឺតែប្រមាណ ២ពាន់លានយេន ឬស្មើនឹង ១៨លានដុល្លារអាមេរិកប៉ុណ្ណោះ ប៉ុន្តែការខូចខាតជារួមនោះគឺត្រូវបានរដ្ឋាភិបាលជប៉ុនព្យាករណ៍ថា ធំធេងជាងនេះឆ្ងាយជាទីបំផុត ដែលតម្រូវឲ្យមានថវិកាជំនួយបន្ថែមត្រូវអនុម័តជាចាំបាច់ ដើម្បីទ្រទ្រង់ការស្តារហេដ្ឋារចនាសម្ព័ន្ធជារួមឡើងវិញ ដែលអាចត្រូវចំណាយពេលចាប់ពី ១ឆ្នាំឡើងទៅ។
គួរបញ្ជាក់ថា នៅក្នុងកិច្ចប្រជុំគណៈរដ្ឋមន្ត្រីជប៉ុនលើកទី ៥ នៅថ្ងៃសុក្រនេះ រដ្ឋាភិបាលជប៉ុនដឹកនាំដោយលោក អាបេ បានប្តេជ្ញាថានឹងសម្រេចឲ្យបាននូវថវិកាជំនួយក្នុងគ្រាអាសន្នរហូតដល់ ៣៥ពាន់លានយេន ឬស្មើនឹង ៣១១លានដុល្លារអាមេរិក ទៅឲ្យតំបន់ចំនួន ៥៨ ដែលរងគ្រោះដោយទឹកជំនន់ធ្ងន់ធ្ងរ។ ដោយឡែកប្រតិបត្តិការស្វែងរកមនុស្សបាត់ខ្លួន ក៏នៅតែបន្តផងដែរ៕
