​(ប៉េកាំង)៖ យន្ដហោះ C919 គ្រឿងទី២របស់ចិន បានឈានចូល​ដំណាក់កាលថ្មី ជាមួយការធ្វើតេស្ដ​ហោះហើរ​ នៅតាមទីតំាង​ជាច្រើន​នៅទូទាំងប្រទេស ដែលជាការធ្វើតេស្តហោះហើរ​រយៈចម្ងាយឆ្ងាយ​ខុសពីមុន។ នេះបើ​តាមក្រុមហ៊ុន Commercial Aircraft Corp. of China (COMAC) ដកស្រង់​ដោយ​ទីភ្នាក់ងារ សារព័ត៌មាន​ចិនស៊ីនហួរ នៅរសៀលថ្ងៃសុក្រ ទី១៣ ខែកក្កដា ឆ្នាំ២០១៨។

យោងតាម COMAC យន្ដហោះ C919 លេខ ១០២ បានចុះចតនៅ​ឯអាកាសយានដ្ឋាន ដុងយីង សេងលី (Dongying Shengli) ក្នុងខេត្តសានទុង (Shandong) នៃភាគខាងកើត​ប្រទេសចិន​ នៅថ្ងៃព្រហស្បតិ៍​សប្ដាហ៍នេះ បន្ទាប់ពីធ្វើតេស្ដ​ហោះហើររយៈចំងាយ​ឆ្ងាយ​ ជាលើកដំបូងចេញ​ពីទីក្រុង​សៀងហៃ។ COMAC បន្ថែមថា មុនការធ្វើតេស្ដ​ហោះហើរនេះ C919 បានបញ្ចប់​ការធ្វើតេស្ដប្រកប​ដោយជោគជ័យ​ជាច្រើន ដើម្បីត្រៀមខ្លួន​សម្រាប់បេសកកម្ម​នៅពេល​ខាងមុខ។

គួររំលឹកថា យន្ដហោះ C919 ទី១របស់ចិន ក៏ធ្លាប់បានឆ្លងកាត់​ការធ្វើតេស្ដហោះហើរ​ដោយជោគជ័យផងដែរ កាលពីថ្ងៃទី០៥ ខែឧសភា ឆ្នាំ២០១៧ នៅឯអាកាសយានដ្ឋាន​អន្តរជាតិ Shanghai Pudong។ អំឡុងនៃការ​ធ្វើតេស្តនេះ ក្រុមហ៊ុនក្នុងស្រុក និងអន្តរជាតិ​ក៏បានកក់ទិញយន្តហោះ​ប្រភេទនេះ​ រាប់រយគ្រឿង​រួចទៅ​ហើយដែរ៕