(​អ៊ីស្លាម៉ាបាដ)៖ អតីតនាយករដ្ឋមន្ត្រី​ប៉ាគីស្ថាន លោក ណាវ៉ាហ្វ ហ្សារីហ្វ (Nawaz Sharif) កំពុងធ្វើដំណើរត្រឡប់ទៅកាន់ប្រទេសប៉ាគីស្ថានវិញហើយ បើទោះជាលោក​ត្រូវប្រឈមនឹងការ​ជាប់ពន្ធនាគារ ១០ឆ្នាំ ក៏ដោយ។ នេះបើតាម​ការចេញផ្សាយ​ដោយ​សារព័ត៌មាន BBC នៅព្រឹកថ្ងៃសុក្រ ទី១៣ ខែកក្កដា ឆ្នាំ២០១៨។

លោក Sharif និងកូនស្រីរបស់​លោកឈ្មោះ ម៉ាយ៉ាម (Maryam) កំពុងប្រឈម​នឹងការចាប់ខ្លួន នៅពេលដែលអ្នក​ទាំងពីរចាកចេញពីទីក្រុង ឡុងដ៍​ប្រទេស​អង់គ្លេស ទៅដល់ទីក្រុងឡាហ័រ (Lahore) នៅថ្ងៃសុក្រនេះ។ លោក Sharif ត្រូវសភា​បណ្ដេញចេញពីតំណែង​កាលពីឆ្នាំ ២០១៧ បន្ទាប់ពីមាន​ការស៊ើបអង្កេតមួយ​ លើសំណុំរឿង​អាស្រូវពុករលួយ ហើយលោកត្រូវ​បានតុលាការកាត់ទោស​កំបាំងមុខ កាលពីសប្ដាហ៍​មុនដាក់​ពន្ធនាគារ ១០ឆ្នាំ។

គួរបញ្ជាក់​ថា លោក Nawaz Sharif បានច្រានចោល​រាល់ការចោទប្រកាន់ ហើយថា​ការកាត់ទោសរូបលោក​ គឺជាចេតនានយោបាយចង់បង្កឧបសគ្គដល់​គណបក្សរបស់លោក​ ក្នុងការបោះឆ្នោត​នៅ​ថ្ងៃទី២៥ ខែកក្កដានេះ។ លោក Sharif បានគូសបញ្ជាក់ យ៉ាងដូច្នេះថា «បើទោះជាខ្ញុំ​កំពុងមើលឃើញ​រនាំងដែក​ក្នុងគុក​ នៅចំពោះមុខខ្ញុំ​ក៏ដោយ ក៏ខ្ញុំត្រូវតែ​ត្រឡប់ទៅ​កាន់ប៉ាគីស្ថាន»។

កាលពីសប្តាហ៍​មុននេះ លោក Sharif ក៏ធ្លាប់បានថ្លែងពី​អង់គ្លេសមកដែរ លោកមិនខ្លាច​នឹងប្រឈមមុខចំពោះ​តុលាការប៉ាគីស្ថានឡើយ ប៉ុន្តែលោក​ចង់នៅមើលថែទាំ​ជំងឺ​របស់ភរិយាលោក​​ឲ្យបានធូរស្រាលសិន ខណៈភរិយាលោកកំពុង​សម្រាកព្យាបាល​នៅមន្ទីរពេទ្យទីក្រុង​ឡុងដ៍នៅឡើយ៕