(បាងកក)៖ នាយករដ្ឋមន្ត្រីថៃលោក ប្រាយុទ្ធ ចាន់អូចា បានសម្តែងនូវសមានទុក្ខយ៉ាងក្រៀមក្រំជូនចំពោះប្រជាជាតិចិនទាំងមូល នៅករណីលិចទូកដឹកអ្នកទេសចរចិន នៅក្នុងដែនសមុទ្រនៃកោះភូកេត ភាគខាងត្បូងប្រទេសថៃ ដែលបានបណ្តាលឲ្យជនជាតិចិនសរុប ៣៨នាក់ស្លាប់ និង ១៨នាក់ទៀតកំពុងបាត់ខ្លួននៅឡើយ។ នេះបើតាមការចេញផ្សាយដោយ ស៊ីនហួរ នាល្ងាចថ្ងៃសៅរ៍ ទី០៧ ខែកក្កដា ឆ្នាំ២០១៨។
នៅក្នុងវិមានរដ្ឋាភិបាលថៃ នាទីក្រុងបាងកកថ្ងៃសៅរ៍នេះ លោក ប្រាយុទ្ធ បានថ្លែងយ៉ាងដូច្នេះថា «រដ្ឋាភិបាលថៃនឹងខិតខំប្រែងឲ្យអស់ពីសមត្ថភាព ដើម្បីស្វែងករកមនុស្សបាត់ខ្លួន និងជួយថែទាំដល់អ្នកដែលនៅរស់ផងដែរ»។ បន្ថែមពីនេះទៀត មជ្ឈមណ្ឌលគាំទ្រប្រតិបត្តិការសង្គ្រោះមួយ នឹងត្រូវបង្កើតឡើងនៅខេត្ត ភូកេត ខណៈការស៊ើបអង្កេតរកមូលហេតុលិចទូកទាំងពីរគ្រឿង ក៏នឹងត្រូវធ្វើឡើងជាបន្ទាន់។
យោងតាមអាជ្ញាធរថៃ ទូកចំនួនពីរគ្រឿងបានដឹកអ្នកទេសចរចិនជិត ១៥០នាក់ ទាំងយប់ឆ្លងកាត់សមុទ្រនៃកោះភូកេត ទាំងដែលពេលនោះកំពុងមានព្យុះកើតឡើង ហើយជាលទ្ធផលទូកទាំងពីរគ្រឿងនេះបានលិច ដោយសារតែភ្លៀងខ្យល់បោកបក់ អមដោយរលកធំៗ។ សម្រាប់ក្រុមជំនាញចិនដែលមកប្រទេសថៃពេលនេះ គឺដើម្បីជួយស្វែងរកមនុស្សបាត់ខ្លួន និងរៀបចំយកសាកសពជនរងគ្រោះទាំងអស់ ត្រឡប់ទៅកាន់ប្រទេសកំណើតវិញ នៅពេលការរុករកបញ្ចប់រួចរាល់។
គួរបញ្ជាក់ថា ទូកដែលលិចខាងលើរួមមានឈ្មោះ ស៊ីរេណាតា (Serenata) ដោយមនុស្សទាំងអស់ ៤២នាក់នៅនោះ ត្រូវជួយសង្រ្គោះទាន់ពេលវេលា ខណៈក្នុងចំណោមមនុស្សទាំង ១០៥នាក់ ដែលធ្វើដំណើរលើទូកឈ្មោះ ហ្វឺនិច (Phoenix) វិញមាន ៣៨នាក់ហើយបានស្លាប់, ១៨នាក់កំពុងបន្តបាត់ខ្លួន និង ៤៨នាក់ត្រូវបានជួយសង្រ្គោះ។ សម្រាប់អ្នកភ្ញៀវទេសចរនៅលើទូកទាំងពីរគ្រឿង គឺសុទ្ធតែជាជនជាតិចិន៕
