(បរទេស)៖ ពិភពលោកពិតជាធំធេងណាស់ ហេតុដូច្នេះសកម្មភាពប្លែកៗរបស់មនុស្ស តែងតែកើតមានឡើងជារៀងរាល់ថ្ងៃ ដែលរឿងរ៉ាវខ្លះគួរឲ្យយើងធ្វើការស្វែងយល់ពីសកម្មភាពនោះ និងដើមចមដែលនាំឲ្យវាកើតឡើង ខណៈខ្លះទៀតជារឿងរ៉ាវដែលគួរយកគំរូតាម និងកោតសរសើរ។
ខាងក្រោមនេះ គឺជាខ្សែវីដេអូអន្តរជាតិពិសេសៗ និងប្លែកៗទាំង ០៥ ដែលលោកអ្នកមិនគួរមើលរំលង ដែលជាភាគទី២៖
១៖ ខណៈត្រីសាល់ម៉ុនកំពុងត្រូវប៉ាន់ពាសពេញពិភពលោក ប្រទេសចិនឯណេះវិញក៏កំពុងតែបង្កើតកន្លែងចិញ្ចឹម និងបង្កាត់ពូជហ្នឹងគេផងដែរ ដែលជាកសិដ្ឋានចិញ្ចឹមត្រីក្នុងសមុទ្រដ៏ជ្រៅ ជាលើកដំបូងមិនធ្លាប់មាននោះទេ។ កន្លែងចិញ្ចឹមត្រីនេះ គឺមានសមត្ថភាពផ្ទុក និងចិញ្ចឹមត្រីសាល់ម៉ុនម្តងរហូតដល់ទៅ ៣០០,០០០ក្បាល និងអាចផ្តល់ទិន្នផលសាច់ត្រី ១,៥០០តោន ជាមធ្យមក្នុងមួយឆ្នាំ។
២៖ ទីបំផុតមូលនិធិសត្វព្រៃ ZWF នៃទីក្រុងម៉ៃអាមី ភាគខាងត្បូងសហរដ្ឋអាមេរិក បាននាំយកសត្វស្វាឈ្មោះ Limbani ដ៏គួរឲ្យស្រឡាញ់ ទៅជួបជុំជាមួយឪពុកម្តាយចិញ្ចឹមរបស់វាវិញហើយ។ កូនស្វាមួយនេះ បានកើតមកជាមួយនិងជំងឺរលាកសួត ទើបត្រូវបានមនុស្សយកវាទៅចិញ្ចឹម និងសុំឲ្យអង្គការ ZWF ជួយថែទាំនៅរយៈពេលប៉ុន្មានខែដំបូង រហូតដល់វាបានធូរស្បើយពេលនេះ។
៣៖ រថយន្តទំនើបស៊េរីថ្មី BMW មួយគ្រឿង ត្រូវបានដុតបណ្តាលឲ្យឆាបឆេះសល់តែគ្រោងដែកប៉ុណ្ណោះ ទោះបីជាក្រុមអ្នកពន្លត់បានមកដល់ទីកន្លែង និងព្យាយាមពន្លត់យ៉ាងអស់ពីសមត្ថភាពក៏ដោយ។ យោងតាមកាមេរ៉ាសាធារណៈនៅម្តុំកន្លែងកើតហេតុ នៃទីក្រុងយ៉ាងចូវ ភាគខាងកើតប្រទេសចិន ក្មេងៗមួយចំនួនត្រូវបានគេសង្ស័យថា ជាអ្នកបង្កហេតុការណ៍នេះឡើង ដោយសារតែគេឃើញពួកគេ ព្យាយាមរត់គេចចេញពីកន្លែកកើតហេតុយ៉ាងតក់ក្រហល់។
៤៖ អ្នកដំណើរកំពុងជិះរថយន្តក្រុងសុខៗ ស្រាប់តែឧបករណ៍ Power Bank របស់នាងបានផ្ទុះឡើងចេញជាអណ្តាតភ្លើង ហើយនាងក៏គ្រវែងចោលទៅក្បែរកៅអីតៃកុងឡាន ដែលកំពុងបើកបរ។ សំណាងល្អដែលតៃកុងឡានមានស្មារតីល្អ ដោយបានឈប់រថយន្តនៅម្ខាងផ្លូវ រួចយកឧបករណ៍មកពន្លត់ភ្លើង និងផ្សែងទាន់ពេល។ ហេតុការណ៍នេះមិនបានបង្ករបួសដល់នរណាម្នាក់ក្នុងរថយន្តក្រុងឡើង។
៥៖ ទីបំផុតតំបន់ភ្នំហ្វានជីងសានរបស់ចិន ត្រូវបានចុះបញ្ជីជាសម្បត្តិបេតិកភណ្ឌពិភពលោក របស់អង្គការ UNESCO ហើយកាលពីថ្ងៃទី០២ ខែកក្កដា ឆ្នាំ២០១៨។ វាត្រូវបានទទួលស្គាល់ជាអន្តរជាតិថា ជាជម្រកនៃជីវៈចំរុះដ៏សំបូរបែបដូចជា រុក្ខជាតិ និងសត្វកម្រជាច្រើនផងដែរ។ ភាពជាក់ស្តែងនៃតំបន់ភ្នំ ហ្វានជីងសាន នេះគឺវាត្រូវបានគ្របដណ្តប់ ៩៥ភាគរយដោយព្រៃឈើតែម្តង ហើយក៏ជាកន្លែងដែលកំពុងទាក់ទាញភ្ញៀវទេសចរមកពីគ្រប់ទិសទីផងដែរ។
