(វ៉ាស៊ីនតោន)៖ ក្រសួងការ​បរទេស​អាមេរិកបានចោទ​ប្រកាន់រុស្ស៊ីថា បាននិងកំពុងបំផ្លាញ​សេរីភាព​សារព័ត៌មាន និងគាប​សង្កត់លើ​ប្រព័ន្ធ​ផ្សព្វផ្សាយ​ឯករាជ្យ បន្ទាប់ពី​តុលាកការរុស្ស៊ី​សម្រេចចិត្តផាកពិន័យ ​វិទ្យុគាំទ្រ​ដោយរដ្ឋាភិបាល​អាមេរិក អឺរ៉ុបសេរី (Radio Free Europe (RFE)) សម្រាប់ការរំលោភ​លើច្បាប់ទីភ្នាក់ងារ​បរទេស​របស់រុស្ស៊ី។ នេះបើតាម​ការចេញផ្សាយ​ដោយ​ទីភ្នាក់ងារ សារព័ត៌មាន Reuters​ នៅព្រឹកថ្ងៃសៅរ៍ ទី០៧ ខែកក្កដា ឆ្នាំ២០១៨។

RFE បាននិយាយថា ការសម្រេចចិត្ត​របស់តុលាការរុស្ស៊ីកាលពី​ថ្ងៃព្រហស្បតិ៍ គឺផ្ទុយទាំងស្រុង​ពីច្បាប់ទីភ្នាក់ងារបរទេស​របស់ទីក្រុងម៉ូស្គូ ហើយថា​ការផាកពិន័យ​ជាប្រាក់ ១,៥៨៥ដុល្លារ ធ្វើឡើងក្នុង​គោលបំណងប្រឆាំង​នឹងប្រតិបត្តិការរបស់ RFE។ ដោយឡែក ជុំវិញបញ្ហា​នេះដែរ អ្នកនាំពាក្យក្រសួង​ការបរទេស​អាមេរិក លោក​ស្រី Heather Nauert បានលើកឡើង​យ៉ាងដូច្នេះថា «រដ្ឋាភិបាលរុស្ស៊ី នៅតែបន្តតាម​បំផ្លាញសេរីភាព​សារព័ត៌មាន និងប្រព័ន្ធផ្សព្វផ្សាយ​ឯករាជ្យ។ យើងថ្កោលទោស​យ៉ាងខ្លាំ​ង ចំពោះជ្រើសរើស​យកវិទ្យុ RFE និង​វិទ្យុ VOA (Voice of America) ជាគោលដៅ​នៃច្បាប់ទីភ្នាក់ងារ​បរទេសរបស់រុស្ស៊ី»។

គួរបញ្ជាក់ថា វិទ្យុ RFE និងវិទ្យុ VOA (Voice of America) ត្រូវបានទីក្រុងម៉ូស្គូ​ចាត់ទុកថា ជាទីភ្នាក់ងារបរទេស​កាលពីខែធ្នូ ឆ្នាំ២០១៧ ហើយការចាត់ទុក​នេះទៀតសោត​ គឺជាការសងសឹកទៅនឹង​សហរដ្ឋអាមេរិក ដែលរុស្ស៊ីចោទ​ថា បានដាក់សម្ពាធ​លើសារព័ត៌មានរុស្ស៊ី​ នៅ​សហរដ្ឋអាមេរិក៕