(ម៉ូស្គូ)៖ ក្រុមបាល់ទាត់មាន់គកបារាំង បានកក់កៅអីឡើងទៅវគ្គ៤ក្រុម ក្រោយទម្លាក់គូប្រជែងមកពីតំបន់អាមេរិកឡាទីន អ៊ុយរ៉ាហ្គាយ ២-០ ដែលទើបបញ្ចប់មុននេះក្នុងវគ្គ១៦ក្រុមនៃ FIFA World Cup 2018 ដែលមាមរុស្ស៊ីធ្វើម្ចាស់ផ្ទះ។
ការបាត់បង់កីឡាករខ្សែប្រយុទ្ធសំខាន់ Edinson Cavani ដោយបញ្ហារបួសនោះ បានធ្វើអោយអតីតម្ចាស់ជើងឯក World Cup ២សម័យមានបញ្ហានៅតំបន់ប្រយុទ្ធជាខ្លាំង ខណ: Luis Suarez ដែលចាប់ដៃគូជាមួយ Christian Stuani ធ្វើមិនបានល្អដូច Cavani ឡើយ។
កីឡាករខ្សែការពារ Raphael Varane ជាអ្នកតែតគ្រាប់ទី១អោយបារាំងនៅនាទីទី៤០ ក្រោយទទួលបាល់ហ្រ្វីឃីកដោយ Antoine Griezmann មុនពេលគ្រាប់ទី២កើតឡើងនៅនាទីទី៦១ ពីការស៊ុតពីចម្ងាយដោយខ្សែប្រយុទ្ធ Griezmann រហូតដល់ចប់ការប្រកួតពេញម៉ោង ៩០នាទី
បារាំង បានធ្វើការសងសឹកអ៊ុយរ៉ាហ្គាយសម្រេចវិញហើយ ក្រោយលេងមិនឈ្នះសោះពីការជួបគ្នា៣ដងនៅ World Cup ក្រៅពីស្មើ២ដង និងចាញ់ ២-១ ម្តងមកនោះ
បារាំង ត្រូវរង់ចាំជំនួបរវាងប្រេស៊ីល ប៉ះប៊ែលហ្ស៊ិកនាម៉ោង ១យប់រំលងអាធ្រាត្រ ដើម្បីស្វែងរកក្រុមឈ្នះឡើងទៅប៉ះគ្នាវគ្គពាក់កណ្តាលផ្តាច់ព្រ័ត្រជាបន្តទៀត៕
