(ម៉ូស្គូ)៖ ការប្រកួតនៅព្រឹត្តិការណ៍បាល់ទាត់​ពិភពលោក World Cup 2018 បានបញ្ចប់វគ្គ ១៦ ក្រុមចុងក្រោយ​ហើយ​ កាលពីយប់ថ្ងៃ​អង្គារកន្លងទៅ ដោយគេបានរកឃើញ​ក្រុមខ្លាំងៗ ដែលត្រួវជួបគ្នាបន្ត​ក្នុងវគ្គ ០៨ ក្រុមចុងក្រោយ នៅយប់ថ្ងៃសុក្រ​សប្ដាហ៍នេះ។ ប៉ុន្តែ​មានរឿងរ៉ាវនឹងស្មាន​មិនដល់ជាច្រើន បានកើតឡើងកាលពីក្នុងវគ្គ ១៦ ក្រុមចុងក្រោយ ហើយខាងក្រោម​នេះ គឺជាចំណុចទាំង ០៥ ដែលគួរឱ្យ​ចាប់អារម្មណ៍៖

១៖ គ្រប់គ្រងបាល់​បានច្រើន​មិនមែនកំណត់​ថា នរណា​ជាអ្នកឈ្នះនោះទេ​

ការប្រកួតរវាងអេស្ប៉ាញ និងរុស្ស៊ី បានអូសបន្លាយ​ពេលដល់ ១២០នាទី មុននឹងឈាន​ដល់ការទាត់​បាល់ ១១ម៉ែត្រ ម្នាក់ ០៥គ្រាប់។ ក្នុងរយៈពេល​ ១២០នាទី ក្រុមជម្រើសជាតិ​អេស្ប៉ាញ បាន​គ្រប់គ្រងបាល់​ស្ទើរតែទាំងស្រុង ហើយបញ្ជូន​បាល់ឱ្យគ្នាទៅវិញ​ទៅមករហូត​ដល់ ១,០០០ដងឯណោះ។ ប៉ុន្តែនៅចុង​បញ្ចប់បែរជា​មកត្រូវចាញ់រុស្ស៊ី​យ៉ាងចុកឈាម ដោយការកាត់ក្ដី​ដោយទាត់បាល់ ១១ម៉ែត្រ ទៅវិញ។

២៖ ជ័យជម្នះ​នៅចុងម៉ោង

ជប៉ុនបាន​ស៊ុតបាល់បញ្ចូល​ទី ០២គ្រាប់មុន លើក្រុមជម្រើស​ជាតិ ប៊ែលហ្សិក ក្នុងវគ្គទី២ ហើយលទ្ធផល​ពីរគ្រាប់នេះ​ បានធ្វើអ្នកគំាទ្រ​ភាគច្រើនយល់ថា ជប៉ុនអាចនឹង​យកឈ្នះក្នុងការ​ប្រកួតនេះ។ ប៉ុន្តែមនុស្ស​គិត មិនដូចទេវតាគិត ពោលគឺឈាន​ចូលនាទី ៦៩ កីឡាករប៊ែលហ្សិក Jan Vertonghen ​បានទាត់បាល់​បញ្ចូលទីមួយគ្រាប់​ តាមពីក្រោយ​ជប៉ុនមកមក​វិញ មុននឹងកីឡករ Marouane Fellaini ស៊ុត​តាមស្មើនៅ​នាទី ៧៤។ ប៉ុន្តែអ្វីដែលរឹតតែបង្កការភ្ញាក់ផ្អើលខ្លាំងទៅទៀតនោះ គឺនៅនាទី ៩០ បូក ៤ ទៅហើយ ទើបកីឡាករ​ប៊ែលហ្សិក Nacer Chadi អាចស៊ុតចូល​យកជ័យជម្នះ​បញ្ចប់ក្ដីស្រមៃរបស់ក្រុមសាំ​មូរ៉ៃជប៉ុន នៅត្រឹមវគ្គ ១៦ ក្រុមចុងក្រោយ។

៣៖ តើ Mbappe នឹងក្លាយជាកីឡាករល្អជាងគេនៅលើលោក?

ក្នុងព្រឹត្តិការណ៍បាល់ទាត់​ពិភពលោកនេះ មនុស្សភាគច្រើនផ្ដោត​អារម្មណ៍លើ Lionel Messi និង Cristiano Ronaldo។ ប៉ុន្តែ​អ្នកទាំងពីរ​បានជិះយន្ដហោះដឹកនាំ​ក្រុមជម្រើសជាតិ​រៀងៗខ្លួន ត្រឡប់ទៅស្រុកកំណើត​វិញហើយក្រោយ អាហ្សង់ទីន ចាញ់បារាំង ៣ ទល់នឹង ៤ និងព័រទុយហ្កាល់​ ចាញ់អ៊ុយរ៉ាហ្កាយ ០ ទល់នឹង ២។ ក្នុងជំនួប​អាហ្សង់ទីន និងបារាំង Mbappe បានបង្ហាញ​ទម្រង់លេង និងទទួលបាន​ការចាប់អារម្មណ៍​ជាខ្លាំង ក្រោយរកបាន​ពីរគ្រាប់តែ​ម្នាក់ឯង ហើយកា្លយកីឡាករ​វ័យក្មេងបំផុតត្រឹម ១៩ឆ្នាំ រកបានពីរ​គ្រាប់ម្នាក់ឯង​ក្នុង​ព្រឹត្តិការណ៍ World Cup។

៤៖ មានកីឡាករខ្លាំងលើលោកក្នុងក្រុមក៏ដោយ «ក៏មិនប្រាកដថាឈ្នះ»

Lionel Messi និង Cristiano Ronaldo សុទ្ធតែកីឡាករ​កំពូលរបស់ពិភពលោក។ តែអ្នកទាំងពីរមិន​អាចជួយឱ្យក្រុមជម្រើសជាតិ​របស់ខ្លួន ឡើងទៅ​វគ្គ ០៨ ក្រុមចុងក្រោយបានឡើយ ដោយពួកគេត្រូវជិះយន្ដហោះត្រឡប់​ទៅស្រុកវិញ ត្រឹមវគ្គ ១៦ ក្រុមចុងក្រោយ។

៥៖ ពិភពលោកស្រឡាំងកាំង ក្រោយអង់គ្លេសឈ្នះ​ដោយសារការស៊ុតបាល់ ១១ម៉ែត្រ

អង់គ្លេស​ត្រូវបានគេស្គាល់ថា ជាក្រុមជើងខ្លាំង​មួយនៅអឺរ៉ុប ខណៈអ្នកខ្លះថា «ខ្លាំងបាន​តែជាមួយ​ក្រុមល្មម»។ ប៉ុន្តែអង់គេ្លស​នៅពេល នេះបានបំបែក​កំណត់ត្រាថ្មីមួយ ដោយយកឈ្នះ​គូប្រកួតដោយទាត់​បាល់ ១១ម៉ែត្រ ជាលើកដំបូង​ក្នុងព្រឹត្តិការណ៍ World Cup។ អង់គ្លេស​បានយកឈ្នះ​កូឡំប៊ី តាមរយៈការទាត់​បាល់ ១១ម៉ែត្រ ដោយទទួលបានលទ្ធផល ៤ ទល់នឹង ៣ កាលពីយប់​ថ្ងៃអង្គារ៕

ប្រភព៖ ស៊ីនហួរ