(អាមេរិក)៖ អ្នកទាំងឡាយដែលពិតជាមានក្តីប្រាថ្នា ចង់ចាកចេញពីជីវិតរស់នៅលើភពផែនដី ប្រហែលជាគួរធ្វើការពិចារណាចុះឈ្មោះជាប្រជាជននៃប្រទេស អាសក្រាដៀ (Asgradia) ដែលកំពុងមានក្តីសង្ឃឹមថា នឹងអាចកសាងទីសំណាក់អចិន្រ្តៃយ៍ នៅលើឋានព្រះច័ន្ទតែម្តង។ នេះបើតាមការដកស្រង់ការផ្សាយចេញពីសារព័ត៌មាន Business Insider នៅរសៀលថ្ងៃចន្ទ ទី០២ ខែកក្កដា ឆ្នាំ២០១៨។
អាសហ្គាឌា (Asgardia) ត្រូវបានបង្កើតឡើងកាលពីឆ្នាំ២០១៦ ហើយមកទល់ពេលនេះត្រូវគេអះអាងថា មានប្រជាជនចំនួន ២០០,០០០នាក់ ហើយ Asgradia ក៏មានរដ្ឋធម្មនុញ្ញ និងសភាដែលកើតចេញពីការបោះឆ្នោតផងដែរ។ សម្រាប់មេដឹកនាំរបស់ប្រទេសអវកាសនេះវិញ មានឈ្មោះថា អ៊ីហ្គ័រ អាស៊ឺបៃលី (Igor Ashurbeyli) មានតួនាទីជាវិស្វករ អ្នកវិទ្យាសាស្រ្តកុំព្យូទ័រ និងពាណិជ្ជកររុស្ស៊ី ហើយលោកបានឡើងកាន់តំណែងដើម្បីដឹកនាំ Asgardia កាលពីថ្ងៃទី២៥ ខែមិថុនាកន្លងទៅនេះ។
ប្រជាជន Asgardia មានគម្រោងធំៗក្នុងនោះ ពួកគេចង់បង្កើនចំនួនជនជាតិខ្លួន ឲ្យបាន ១៥០លាននាក់ នៅក្នុងរយៈពេល ១០ឆ្នាំ ហើយពួកគេក៏មានគោលដៅអភិវឌ្ឍន៍នាវាអវកាសយក្សមួយ នៅក្នុងទីអវកាស ជាកន្លែងដែលមនុស្សលោករស់នៅបានជាអចិន្រ្តៃយ៍ផងដែរ។ លោក Ashurbeyli បានថ្លែងសារជាលើកដំបូងរបស់លោក ក្នុងនាមជាប្រធានាធិបតីរបស់ Asgardia នៅឯទីក្រុងវីយែន (Vienna) ប្រទេសអូទ្រីស។
ប្រទេស Asgardia បានយកឈ្មោះតាម អាសហ្គាដ (Asgard) ដែលជាទីឋាននៅលើមេឃ ក្នុងទេវកថារបស់ប្រទេសអឺរ៉ុបខាងកើត។ បច្ចុប្បន្ន Asgardia មានប្រជាជនរស់នៅតាមប្រទេសជាង ២០០ ហើយអ្នកទាំងឡាយដែលចង់ក្លាយជាប្រជាជនរបស់ Asgradia អាចធ្វើការចុះឈ្មោះបានតាមអនឡាញ។
គួរជម្រាបថា គម្រោងរបស់លោក Ashurbeyli មានដូចជាបង្កើតក្រុមផ្កាយរណប ដែលអាចផ្តល់សេវាអ៊ីនធើណែតនៅទូទាំងពិភពលោក ក្នុងរយៈពេល ០៥ ទៅ ០៧ឆ្នាំខាងមុខ ហើយលោកក៏ចង់មាននាវាអវកាសមួយគ្រឿង ដែលអាចធ្វើប្រតិបត្តិការបាននៅ ១០ ទៅ ១៥ឆ្នាំខាងមុខផងដែរ។ ប្រធានាធិបតីប្រទេសអវកាសនេះ មានគម្រោងបង្កើតមូលដ្ឋានអចិន្រ្តៃយ៍មួយ នៅលើឋានព្រះច័ន្ទផងដែរ ក្នុងរយៈពេល ២៥ឆ្នាំ ទៀត៕
