(ប៊ែរឡាំង)៖ រដ្ឋមន្ត្រីមហាផ្ទៃអាល្លឺម៉ង់ លោក ហសត៍ ស៊ីហូហ្វឺ (Horst Seehofer) បានសម្រេចចិត្តលាលែងពីតំណែងហើយ ដោយសារតែមិនពេញចិត្តជាខ្លាំងចំពោះគោលនយោបាយដោះស្រាយបញ្ហាជនអន្តោប្រវេសន៍ របស់អធិការបតីអាល្លឺម៉ង់ លោកស្រី អាន់ជែឡា មឺគែល។ នេះបើតាមប្រព័ន្ធផ្សព្វផ្សាយនៅក្នុងស្រុកដកស្រង់ដោយសារព័ត៌មាន BBC នៅថ្ងៃចន្ទ ទី០២ ខែកក្កដា ឆ្នាំ២០១៨។
លោក Horst Seehofer ជាប្រធានគណបក្ស CSU ដែលជាដៃគូគណបក្សចំរុះនយោបាយដ៏សំខាន់របស់លោកស្រី មឺគែល បាន សម្ដែងការខឹងសម្បារយ៉ាងខ្លាំង ក្នុងមួយរយៈពេលចុងក្រោយនេះ ទៅនឹងគោលនយោបាយអន្តោប្រវេសន៍។ ជាក់ស្ដែងកាលពីសប្ដាហ៍មុន លោក Seehofer បានព្រមានបណ្ដេញជនអន្តោប្រវេសន៍ ចេញឱ្យឆ្ងាយពីព្រំដែនអាល្លឺម៉ង់ រហូតទាល់តែលោកស្រី មឺគែល ឈានដល់ការទទួលយកកិច្ចព្រមព្រៀងណាមួយ ជាមួយបណ្ដាប្រទេសជាសមាជិកសហភាពអឺរ៉ុបដទៃទៀត។
គួរបញ្ជាក់ថា កាលពីថ្ងៃអាទិត្យ គណបក្ស CDU របស់លោកស្រី មឺគែល បានអនុម័តលើដំណោះស្រាយមួយ ស្ដីពីជនអន្តោប្រវេសន៍ដោយជឿជាក់ថា វាជាដំណោះស្រាយចំាបាច់បំផុត សម្រាប់សហភាពអឺរ៉ុប។ ប៉ុន្តែក្រោយការអនុម័តនេះ សារព័ត៌មាននៅក្នុងស្រុកជាច្រើនបានរាយការណ៍ថា លោក Horst Seehofer បានប្រកាសពីបំណងលាលែងពីតំណែង ជាប្រធានគណបក្ស CSU និងជារដ្ឋមន្ត្រីមហាផ្ទៃអាល្លឺម៉ង់៕
