(វ៉ាស៊ីនតោន)៖ បណ្តាស្ថាប័ន​ស៊ើបការណ៍​សម្ងាត់អាមេរិក​មានការជឿជាក់​ថា កូរ៉េខាងជើង បានលួចសំងំ​បង្កើន​សង្វាក់ផលិកម្ម​នៃឥន្ទនៈ​សម្រាប់​អាវុធ​នុយក្លេអ៊ែរ​នៅតាមទីតាំងសម្ងាត់ៗជាច្រើនកន្លែង ក្នុងអំឡុងពេលប៉ុន្មាន​ខែចុងក្រោយនេះ ហើយប្រហែល​ជាបាន និងកំពុង​ព្យាយាមលាក់បាំងរឿង​ទាំងនេះ តាមរយៈការស្វែងរក​សម្បទាន​នានា ​នៅក្នុងកិច្ចចរចា​នុយក្លេអ៊ែរជាមួយ​សហរដ្ឋអាមេរិក កាលពីប៉ុន្មាន​​​សប្តាហ៍​មុន។ នេះបើតាម​សេចក្តីរាយការណ៍​របស់សារព័ត៌មាន​អាមេរិក NBC ដកស្រង់ខ្លឹមសារ​ដោយ​សារព័ត៌មាន Channel News Asia នៅព្រឹក​ថ្ងៃសៅរ៍ ទី៣០ ខែមិថុនា ឆ្នាំ២០១៨។

ការវាយតម្លៃខាងលើនេះ​ របស់សហគមន៍​ស៊ើបការណ៍​សម្ងាត់អាមេរិក ហាក់ដូចមិន​ស្របជាមួយ​ទស្សនៈ​របស់ប្រធានាធិបតី​លោក ដូណាល់ ត្រាំ បានបង្ហោះសារ​ នៅក្រោយជំនួបកំពូល​ជាប្រវត្តិសាស្រ្ត កាលពី​ថ្ងៃទី១២ ខែមិថុនា ជាមួយ​ប្រមុខដឹកនាំ​កូរ៉េខាងជើង លោក គីម ជុងអ៊ុន ថា លែងមាន​ការគំរាមកំហែង​ នៃអាវុធនុយក្លេអ៊ែរ​ពីសំណាក់​កូរ៉េខាងជើង​ទៀតហើយ។

សារព័ត៌មាន NBC តាមរយៈការស្រង់​សម្តីពីមន្រ្តីរដ្ឋាភិបាល​អាមេរិក ដែលមិន​បញ្ចេញអត្តសញ្ញាណ​ចំនួន ០៥រូប បាន​រាយការណ៍ថា នាអំឡុង​ពេលប៉ុន្មាន​ខែកន្លង​ទៅនេះ កូរ៉េខាងជើង​បានបង្កើនផលិតកម្ម​ នៃការ​ចម្រាញ់​អ៊ុយរ៉ាញ៉ូម សម្រាប់អាវុធ​នុយក្លេអ៊ែរ សូម្បីតែខ្លួន​បានចូលមក​ចរចាតាមផ្លូវការទូត​ជាមួយសហរដ្ឋអាមេរិ​ក​ក៏ដោយក្តី។ ការវាយតម្លៃ​របស់បណ្តាទីភ្នាក់ងារស៊ើបការណ៍​សម្ងាត់អាមេរិក បានសន្និដ្ឋាន​​ទៀត​ថា កូរ៉េខាងជើង​មានទីតាំងអភិវឌ្ឍន៍​នុយក្លេអ៊ែរ​​ សម្ងាត់ៗជាច្រើន​កន្លែង បន្ថែមពីលើ​ទីតាំងផលិត​ឥន្ទនៈ ដែល​គេបានដឹង​នៅក្រុង យ៉ុងប្យុន (Yongbyon)។

គួរជម្រាបថា យ៉ាងណាមិញ​ទីភ្នាក់ងារ​ចារកម្ម CIA បានបដិសេធ​មិនបញ្ចេញយោបល់​ លើសេចក្តីរាយការណ៍​របស់ NBC ឡើយ ហើយ​​ក្រសួងការបរទេស​អាមេរិក​ក៏បានឲ្យដឹងដែរថា ខ្លួនមិនអាច​បញ្ជាក់ ហើយក៏មិនធ្វើអត្ថាធិប្បាយ​ ទៅលើបញ្ហាការណ៍​សម្ងាត់នោះ​ដែរ។ ​​ចំណែកសេតវិមានវិញ មិនបានឆ្លើយតប​ ចំពោះសំណើ​សុំឲ្យអត្ថាធិប្បាយលើបញ្ហា​នេះ​ឡើយ៕