(ម៉ូស្គូ)៖ នាអំឡុងពេល​​នៃការប្រកួតវគ្គសន្សំពិន្ទុ​​ក្នុងព្រឹត្តិការណ៍ FIFA World Cup សម្រាប់ឡើង​ទៅវគ្គ ១៦ក្រុមចុង​ក្រោយ ដែលបានបញ្ចប់ទៅ​ហើយនោះ មនុស្សមួយចំនួន​​ដែលរួមមាន​ទាំង​អ្នកគាំទ្រ និងអ្នកអត្ថាធិប្បាយកីឡា​ជាដើមបានបាត់​បង់ជីវិតអាយុជីវិត ដោយសារតែធ្វើអត្តឃាត និងសម្ពាធផ្លូវចិត្តធ្ងន់ធ្ងរពេក។ នេះបើតាម​ការដកស្រង់​ការផ្សាយ​ចេញរបស់​សារព័ត៌មានអន្តរជាតិនានា​ នៅព្រឹក​ថ្ងៃសៅរ៍ ទី៣០ ខែមិថុនា ឆ្នាំ២០១៨។

នៅក្រោយពេល​ដែលក្រុមអាហ្សង់ទីន​ចាញ់ក្រូអាត កាលពីមួយសប្តាហ៍មុន អ្នកគាំទ្រវ័យ ៣០ឆ្នាំ ម្នាក់របស់ក្រុមបាល់​ទាត់អាមេរិក​ខាងត្បូង​​មួយនេះ ឈ្មោះ ឌីនូ អាឡិច (Dinu Alex) នៅប្រទេសឥណ្ឌា ដោយឈឺចិត្តពេក​បានសម្រេចទៅ​លោតចូលទន្លេ​ ដើម្បីសម្លាប់​ខ្លួន។

លទ្ធផល​នៃការប្រកួត​រវាងអាហ្សង់ទីន​នឹងក្រូអាតនាពេល​កន្លងទៅ គឺជារឿង​គួរឲ្យភ្ញាក់ផ្អើលបំផុតមួយ ដោយការចាញ់ ០-៣ទល់នឹងក្រូអាតនេះ គឺជា​បរាជ័យដ៏ធំ​​បំផុតសម្រាប់ក្រុម​អាហ្សង់ទីននៅក្នុង​ប្រវត្តិសាស្រ្ត។ បើតាមសំបុត្របន្សល់​ទុកដោយ លោក Alex អ្នកជឿជាក់​ថា អាហ្សង់ទីននឹងអាច​ឡើង​​ទៅវគ្គបន្ទាប់ ប៉ុន្តែលោក​មិនអាចទ្រាំទ្រ​ ចំពោះការចាញ់យ៉ាង​អាម៉ាស់នេះ​បាន។

គួរជម្រាបថា នាពេលកន្លងទៅ​អ្នកអត្ថាធិប្បាយ​បាល់ទាត់​ទូរទស្សន៍​​អេហ្ស៊ីបម្នាក់ ក៏ត្រូវបានគេ​​រាយការណ៍​ថា បានស្លាប់ដោយសារ​​គាំង​បេះ​ដូង​​តែ​​​ប៉ុន្មាន​នាទី​​​ប៉ុណ្ណោះ បន្ទាប់ពី​ក្រុម​ជម្រើសជាតិ​​អារ៉ាប៊ីសាអូឌីត ទាត់បាល់បញ្ចូល​​គ្រាប់ទីពីរដើម្បី​ផ្ដួលអេហ្ស៊ីប​នៅចុង​ម៉ោង​ក្នុង​ព្រឹត្តិ​ការណ៍​​បាល់​​ទាត់​​៕