(វ៉ាស៊ីនតោន)៖ ខ្មាន់កាំភ្លើងដែល​បានបាញ់ប្រហារ​សម្លាប់មនុស្ស ០៥នាក់ នៅឯការិយាល័យ​សារព័ត៌មាន​ក្នុងក្រុង អាន់ណាផូលីស (Annapolis) នៃរដ្ឋម៉ារីឡែនដ៍ (Maryland) សហរដ្ឋអាមេរិក ត្រូវបានអាជ្ញាធរ​បញ្ជាក់ថាកំពុងស្ថិត​ក្រោមការឃុំឃាំង ដើម្បីត្រៀមខ្លួន​ឡើងតុលាការ​ ក្រោយពីត្រូវបានចោទប្រកាន់​ពីបទ​មនុស្ស​ឃាត។ នេះបើតាម​ការដកស្រង់​ការ​​ផ្សាយចេញ​ពីសារព័ត៌មានចិន CGTN នៅព្រឹក​ថ្ងៃសៅរ៍ ទី៣០ ខែមិថុនា ឆ្នាំ២០១៨។

បើតាមប៉ូលិស​អាមេរិក ជនរង​គ្រោះខាងលើរួមមានឈ្មោះ រ៉ូប ហ៊ីយ៉ាសិន (Rob Hiaasen) អាយុ ៥៩ឆ្នាំ, ឈ្មោះ វែនឌី វីនធើស៍ (Wendi Winters) អាយុ ៦៥ឆ្នាំ, ឈ្មោះ រ៉េបេកកា ស្មីត (Rebecca Smith) អាយុ ៣៤ឆ្នាំ, ឈ្មោះ ហ្គែរ៉ាល់ដ៍ (Gerald Fischman) អាយុ ៦១ឆ្នាំ, និង ចន ម៉ាកណាម៉ារ៉ា (John McNamara) ដែលត្រូវបានជនដៃ​ដល់បាញ់សម្លាប់។ ក្នុងចំណោម​​នោះ​លោកស្រី Smith គឺជាជំនួយការ​ផ្នែកលក់របស់​សារព័ត៌មាន កាសែតកាពីតូល (Capital Gazette) ខណៈអ្នកផ្សេង​ទៀត គឺជាអ្នកកាសែត។

គួរជម្រាបថា នៅតែមួយថ្ងៃប៉ុណ្ណោះ​ក្រោយពីបុគ្គលិករបស់ខ្លួន​​ត្រូវបានគេធ្វើឃាត សារព័ត៌មាន​ខាងលើ បានចេញផ្សាយអត្ថបទ​ទំព័រ​មុខ ​ដែលមានបង្ហាញ​រូបថតរបស់ជនរង​គ្រោះម្នាក់ៗ ​ជាមួយចំណង​ជើងធំៗ។ ខណៈពេលនេះ​ប៉ូលិស មិនបានបញ្ចេញ​អត្តសញ្ញាណ​របស់ជន​សង្ស័យដែល​កំពុងស្ថិតក្រោម​ការឃុំឃាំងនោះទេ ប៉ុន្តែបើតាម​សារព័ត៌មាន Capital Gazette ជនសង្ស័យ​មាន​ឈ្មោះថា ហ្សារ៉ូដ រ៉ាម៉ូស (Jarrod Ramos) អាយុ ៣៨ឆ្នាំ ដែលធ្លាប់មាន​បញ្ហាវិវាទ​ដ៏អូសបន្លាយ ជាមួយ​​សារព័ត៌មាន​នេះ ជុំវិញអត្ថបទ​ព័ត៌មានមួយ​កាលពីឆ្នាំ២០១១ ដែលបាន​អះអាង​​ថា លោក Ramos បានបៀតបៀន និងធ្វើទុក្ខបុកម្នេញ​ស្រ្តីម្នាក់នៅលើ​បណ្តាញសង្គម Facebook ហើយថា លោកបានទទួល​កំហុសចំពោះ​​​រឿង​នេះ៕