​(ប៉េកាំង)៖ របាយការណ៍របស់​សមាគមប្រព័ន្ធ​សកល​ សម្រាប់ទំនាក់​ទំនងទូរស័ព្ទ​ចល័ត ឬ Global System for Mobile Communication Association (GSMA) បានឱ្យដឹងថា ប្រទេសចិន​នឹងក្លាយជា​ទីផ្សារ 5G ដ៏ធំបំផុតនៅលើពិភពលោកនៅត្រឹមឆ្នាំ​២០២៥ ជាមួយតំណរភ្ជាប់ 5G ជាង ៤៣០លាន​ ឬស្មើនឹងមួយភាគបី​នៃតំណរភ្ជាប់ 5G​ ទូទាំងពិភពលោក។ នេះបើតាមការចេញ​ផ្សាយដោយ​ ទីភ្នាក់ងារ​ព័ត៌មានចិន ស៊ីនហួរ នៅរសៀលថ្ងៃសុក្រ ទី២៩ ខែមិថុនា ឆ្នាំ២០១៨។

យោងតាម​របាយការណ៍ខាង​លើដដែល ក្រុមហ៊ុនទូរស័ព្ទ​ចល័តចិនទាំងបី កំពុងដឹកនាំការ​ធ្វើតេស្ដលើប្រព័ន្ធ 5G ដែលជាផ្នែកមួយ នៃផែនការរួមមាន​បញ្ចូលទាំង​ការស្រាវជ្រាវ និង​ការអភិវឌ្ឍ ព្រមទាំងការដាក់​ពង្រាយបណ្ដាញយុទ្ធសាស្ត្រ​ ក្រោមទម្រង់​ពាណិជ្ជកម្ម ទ្រង់ទ្រាយធំ​នៅត្រឹម​ឆ្នាំ២០២០។

បន្ថែមពីលើនេះ អគ្គនាយក GSMA លោក ម៉ាត់ស៍ ហ្គ្រេនរីដ (Mats Granryd) ក៏បានគូសបញ្ជាក់​ដែរថា តួនាទី​ឈានមុខគេរបស់ចិន​លើបច្ចេកវិទ្យា 5G ទទួលបានការ​គាំទ្រយ៉ាងពេញទំហឹង​ ពីរដ្ឋាភិបាល​ទីក្រុងប៉េកាំង ដែលមានបំណង​​ផ្ដល់ជូន​នូវសេវា​អ៊ីនធើណែតលឿនបំផុត ដល់ប្រជាជនរបស់ខ្លួន និងសហគ្រាស​នៅទូទាំង​ប្រទេស៕