(ការ៉ាកាស់)៖ ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានហៅអនុប្រធានាធិបតីអាមេរិក លោក ម៉ៃក៍ ផែន (Mike Pence) ថា ជា «សត្វពស់អសិរពិសមួយក្បាល» ហើយសន្យាថា នឹងយកជ័យជម្នះឱ្យបានលើអ្វីដែលលោកចាត់ទុកថា ជាការប៉ុនប៉ងរបស់សហរដ្ឋអាមេរិក ដើម្បីទម្លាក់រូបលោកពីអំណាច។ នេះបើតាមការចេញផ្សាយដោយទីភ្នាក់ងារ Reuters នៅព្រឹកថ្ងៃព្រហស្បតិ៍ ទី២៨ ខែមិថុនា ឆ្នាំ២០១៨។
ប្រតិកម្មរបស់លោក ម៉ាឌូរ៉ូ កើតមានឡើងបន្ទាប់ពីលោក Pence បានធ្វើដំណើរទៅដល់ប្រទេសអេក្វាឌ័រ នៅថ្ងៃពុធសប្ដាហ៍នេះ ជា ផ្នែកមួយនៃដំណើរទស្សនកិច្ចក្នុងតំបន់អាមេរិកខាងត្បូង ដើម្បីបញ្ចុះបញ្ចូលប្រទេសនៅក្នុងតំបន់ ឱ្យចូលរួមដាក់សម្ពាធលើវេណេស៊ុយអេឡា ក្រោយលោក ម៉ាឌូរ៉ូ ជាប់ឆ្នោតជាថ្មីកាលពីខែឧសភា នៅក្នុងការបោះឆ្នោតប្រធានាធិបតី ដែលសហរដ្ឋអាមេរិកចោទ ប្រកាន់ថា ពោរពេញដោយការក្លែងបន្លំ។
តែទោះជាយ៉ាងនេះក្ដី លោក ម៉ាឌូរ៉ូ នៅតែអះអាងដដែលថា សហរដ្ឋអាមេរិក កំពុងព្យាយាមផ្ដួលរំលំរដ្ឋាភិបាលស្របច្បាប់របស់លោក តាមរយៈការធ្វើសង្រ្គាមសេដ្ឋកិច្ច ក្នុងគោលបំណងរឹបអូសប្រេង និងធនធានធម្មជាតិនៃប្រទេសវេណេស៊ុយអេឡា។ មិនតែប៉ុណ្ណោះ លោកថែមទាំងបានហៅអនុប្រធានាធិបតីអាមេរិក លោក Mike Pence ថាជា «សត្វពស់អសិរពិសមួយក្បាល» ទៀតផង។ លោក ម៉ឌូរ៉ូ បានលើឡើងនៅក្នុងសុន្ទកថា តាមកញ្ចក់ទូរទស្សន៍ដូច្នេះថា «រាល់ពេលដែលសត្វពស់ដ៏ពុល Mike Pence បើកមាត់របស់វា ខ្ញុំមានអារម្មណ៍កាន់តែរឹងមំា... ហើយខ្ញុំនឹងយកជ័យជម្នះលើអ្នកឱ្យបានមិនថា អ្នកនៅទីណានោះទេ»។
គួរបញ្ជាក់ថា ប្រធានាធិបតីអាមេរិក លោក ដូណាល់ ត្រាំ បានដាក់ទណ្ឌកម្មសេដ្ឋកិច្ចលើលោក ម៉ាឌូរ៉ូ និងសមាជិករដ្ឋាភិបាលរបស់ លោកជាច្រើននាក់ ដោយចោទថាពួកគេកំពុងបំផ្លាញលទ្ធិប្រជាធិបតេយ្យ និងរំលោភសិទ្ធិមនុស្សធ្ងន់ធ្ងរ៕
