(ញូយ៉ក)៖ ប្រមុខយោធា​មីយ៉ាន់ម៉ា និងមន្ត្រីយោធា​ជាន់ខ្ពស់ជាច្រើននាក់ ត្រូវបានអង្គការ​លើកលែងទោស​អន្តរជាតិ Amnesty International ចោទប្រកាន់ថា បានប្រព្រឹត្តបទ​ឧក្រិដ្ឋប្រឆាំងនឹងមនុស្សជាតិ​ជាលក្ខណៈប្រព័ន្ធ​ លើជនជាតិដើមភាគតិច​រ៉ូហ៊ីងយ៉ា។ នេះបើតាម​ការចេញផ្សាយ​ដោយសារព័ត៌មាន Channel News Asia នៅព្រឹក​ថ្ងៃពុធ ទី២៧ ខែមិថុនា ឆ្នាំ២០១៨។

នៅក្នុងរបាយការណ៍​របស់ខ្លួនចេញផ្សាយ​នៅថ្ងៃពុធនេះ Amnesty International ក៏បានអំពាវនាវឱ្យ​មានការចាត់វិធានការ​ប្ដឹងប្រមុខ យោធា​មីយ៉ាន់ម៉ា លោក មីន អ៊ុងហ្លេង (Min Aung Hlaing) រួមទាំងមន្ត្រី​យោធា និងសន្តិសុខជាន់​ខ្ពស់ ១២នាក់ទៀត ទៅកាន់តុលាការ​ឧក្រិដ្ឋកម្ម​អន្តរជាតិផងដែរ។ អង្គការអន្តជាតិ​មួយនេះបាន​គូសបញ្ជាក់​យ៉ាងដូច្នេះថា «ការបោស​សំអាតជនជាតិដើម​ភាគតិច​រ៉ូហ៊ីងយ៉ា ត្រូវបានធ្វើ ឡើងជាលក្ខណៈ​ប្រព័ន្ធ ជាមួយការ​រៀបចំឱ្យមន្ត្រីសន្ដិសុខមីយ៉ាន់ម៉ា​ សម្លាប់ជនជាតិរ៉ូហ៊ីងយ៉ារាប់ពាន់នាក់ ក្នុងនោះ​រួមមានទាំង កុមារ។ លើសពីនេះ​ទៅទៀត ពួកគេថែមទាំង​ប្រព្រឹត្តអំពើហិង្សាផ្លូវភេទ ការធ្វើទារុណកម្ម ការបង្ខំឱ្យ​ភៀសខ្លួនចេញ និងដុតបំផ្លាញ​ផ្ទះសម្បែង របស់ជនជាតិ​រ៉ូហ៊ីងយ៉ា ទៀតផង»។

គួរបញ្ជាក់ថា ជនជាតិ​រ៉ូហ៊ីងយ៉ា​រាប់រយនាក់​បានស្លាប់ និងច្រើន​ជាង ៧០០,០០០នាក់ ត្រូវបានគេបង្ខំ​ឱ្យចាកចេញពីរដ្ឋ រ៉ាឃីន (Rakhine) ក្រោយមាន​ការបង្រ្កាបពីយោធា​មីយ៉ាន់ម៉ា ដែលអង្គការសហប្រជាជាតិហៅថា ជាការបោស​សំអាត​ពូជសាសន៍។ ប៉ុន្តែរដ្ឋាភិបាល និងយោធាមីយ៉ាន់ម៉ា​បានច្រានចោលការចោទ​ប្រកាន់ហើយថា ប្រតិបត្តិការយោធា​របស់ខ្លួន​មិនមានគោលដៅលើ​ជនស៊ីវិលនោះទេ ពោលគឺ​គ្រាន់តែដើម្បី​ការពារខ្លួន និងប្រឆាំង​ជាមួយក្រុមសកម្ម​ប្រយុទ្ធរ៉ូហ៊ីងយ៉ា ដែលបានវាយប្រហារ​លើប៉ុស្ដន៍ប៉ូលិស កាលពី​ខែសីហា ឆ្នាំ២០១៧ តែប៉ុណ្ណោះ៕