(ដាណឺម៉ាក)៖ ប្រទេសដាណឺម៉ាកកំពុងត្រៀមខ្លួន ចូលរួមក្នុងគម្រោងបង្កើតកម្លាំងអន្តរាគមន៍យោធាអឺរ៉ុប EI2 ដែលផ្តួចផ្តើមដោយបារាំង និងកងកម្លាំងចំរុះ JEF ដែលដឹកនាំដោយចក្រភពអង់គ្លេស ខណៈរដ្ឋមន្រ្តីការពារជាតិដាណឺម៉ាក បានលើកឡើងថា វាគឺជាសញ្ញាមួយនៃសាមគ្គីភាពរបស់អឺរ៉ុប បង្ហាញដល់ប្រធានាធិបតីអាមេរិក លោក ដូណាល់ ត្រាំ។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅល្ងាចថ្ងៃអង្គារ ទី២៦ ខែមិថុនា ឆ្នាំ២០១៨។
រដ្ឋមន្រ្តីការពារជាតិដាណឺម៉ា លោក ក្លស ហ្វ្រែឌែរីកសិន (Claus Frederiksen) បានប្រកាសថា ដាណឺម៉ាកមានមោទនភាពជាខ្លាំង ដើម្បីចូលរួមក្នុងគម្រោងការពារជាតិ EI2 ដែលជាសកម្មភាពមួយស្តែងឲ្យឃើញ ពីចេតនារបស់អឺរ៉ុបក្នុងការបង្កើនសមត្ថភាពទីពឹងខ្លួន ទាក់ទិនបញ្ហាយោធា។ EI2 មានគោលដៅអនុញ្ញាតឲ្យមានការដាក់ពង្រាយកងទ័ព ក្នុងកម្រិតឆាប់រហ័ស នៅក្នុងពេលមានវិបត្តិផ្សេងៗ។
លោក Frederiksen បាននិយាយថា «អឺរ៉ុបត្រូវតែបង្កើនភាពទទួលខុសត្រូវរបស់ខ្លួនបន្ថែមទៀត សម្រាប់សន្តិសុខរបស់ខ្លួនឯងផ្ទាល់»។ ក្នុងសប្តាហ៍នេះ លោក Frederiksen ក៏នឹងធ្វើដំណើរទៅទីក្រុងឡុងដ៍ ដើម្បីចូលរួមកិច្ចប្រជុំពាក់ព័ន្ធនឹងការចាប់ផ្តើមកិច្ចសហប្រតិបត្តិការយោធាមួយផ្សេងទៀតឈ្មោះ JEF ដែលផ្តួចផ្តើមឡើងដោយចក្រភពអង់គ្លេស តាំងពីឆ្នាំ២០១៤ មក។
គួរជម្រាបថា គម្រោង EI2 ដែលដឹកនាំដោយប្រធានាធិបតីបារាំងលោក អ៊ែមម៉ានុយអែល ម៉ាក្រុង (Emmanuel Macron) រួមមានសមាជិកចំនួន ០៩ របស់សហភាពអឺរ៉ុបគឺ បារាំង អាល្លឺម៉ង់ បែលហ្សិក ចក្រភពអង់គ្លេស ដាណឺម៉ាក ហូឡង់ អេស្តូនី អេស៉្បាញ និងព័រទុយហ្គាល់ ដែលបានចុះហត្ថលេខាលើលិខិតប្រកាសពីគោលបំណងមួយនៅឯទីក្រុង លុចហ្សំបួរ (Luxembourg) កាលពីថ្ងៃចន្ទដើមសប្តាហ៍នេះ។
សម្រាប់ JEF វិញក្រៅពីចក្រភពអង់គ្លេស និងដាណឺម៉ាក ក៏រួមមានផងដែរនូវបណ្តាប្រទេសតំបន់សមុទ្របាល់ទិច ហូឡង់ ន័រវែស ព្រមទាំងហ្វាំងឡង់ និងស៊ុយអែត ដែលសុទ្ធតែបានព្រមព្រៀងគ្នា ធ្វើការផ្តល់កងទ័ពរៀងៗខ្លួនឲ្យដាក់ពង្រាយ ក្រោយមានទទួលបានជូនដំណឹងភ្លាមៗ សម្រាប់រាល់បញ្ហាជម្លោះប្រដាប់អាវុធ គ្រប់ទម្រង់នៅជុំវិញពិភពលោក៕
