(តេហេរ៉ង់)៖ ខណៈកិច្ចព្រមព្រៀងនុយក្លេអ៊ែរ បានធ្លាក់ទៅក្នុងភាពមិនច្បាស់លាស់ ប្រធានាធិបតីអ៊ីរ៉ង់លោក Hassan Rouhani បានសង្កត់ធ្ងន់ថា ទីក្រុងតេហេរ៉ង់មានសិទ្ធិដើម្បីបង្កើនសមត្ថភាពចម្រាញ់សារធាតុអ៊ុយរ៉ាញ៉ូម សម្រាប់គោលដៅសន្តិភាព។ នេះបើតាមការដកស្រង់ការផ្សាយចេញពីសារព័ត៌មានរុស្ស៊ី Sputnik នៅរសៀលថ្ងៃអង្គារ ទី២៦ ខែមិថុនា ឆ្នាំ២០១៨។
ជាមួយគ្នានេះ ប្រធានាធិបតីអ៊ីរ៉ង់លោក ហាស្សាន រួហានី (Hassan Rouhani) បានលើកឡើងថា ប្រជាជាតិអ៊ីរ៉ង់នឹងគ្មានថ្ងៃចុះចាញ់ការដាក់សម្ពាធពីសំណាក់ប្រធានាធិបតីអាមេរិក លោក ដូណាល់ ត្រាំ ឡើយ ហើយនឹងប្តេជ្ញាយ៉ាងអង់អាច ដើម្បីការពារឯករាជ្យភាព និងតម្លៃរបស់ពួកគេ។ នៅក្នុងការថ្លែងសុន្ទរកថាមួយផ្សាយផ្ទាល់តាមកញ្ចប់ទូរទស្សន៍រដ្ឋអ៊ីរ៉ង់ លោក Rouhani បានចាត់ទុកការសម្រេចចិត្តរបស់សហរដ្ឋអាមេរិក ក្នុងការបោះបង់ចោលកិច្ចព្រមព្រៀងនុយក្លេអ៊ែរ គឺជាទង្វើខុសច្បាប់ និងអាក្រក់ជាខ្លាំង។
ភាពស្រពិចស្រពិលជុំវិញកិច្ចព្រមព្រៀងនុយក្លេអ៊ែរអ៊ីរ៉ង់ កាន់តែកំពុងមានការកើនឡើងថែមទៀត ដោយអនុរដ្ឋមន្រ្តីការបរទេសអ៊ីរ៉ង់ លោក អាប់បាស់ អារ៉ាកជី (Abbas Araqchi) ក៏បានបង្ហើបដែរថា វាពុំមែនជារឿងមិនអាចទៅរួចនោះឡើយដែលថា ទីក្រុងតេហេរ៉ង់ នឹងដើរចេញពីកិច្ចព្រមព្រៀងមានឈ្មោះផ្លូវការថា JCPOA នេះនៅប៉ុន្មានសប្តាហ៍ខាងមុខ។
គួរជម្រាបថា ក្តីព្រួយបារម្ភជុំវិញបញ្ហាថា កម្មវិធីនុយក្លេអ៊ែរអ៊ីរ៉ង់អាចដំណើរការឡើងវិញនោះ បានកើតមាន បន្ទាប់ពីសហរដ្ឋអាមេរិក បានប្រកាសដកខ្លួនចេញពីកិច្ចព្រមព្រៀង JCPOA ដែលដាក់កំហិតលើកម្មវិធីអភិវឌ្ឍន៍ អាវុធនុយក្លេអ៊ែររបស់ទីក្រុងតេហេរ៉ង់ ជាថ្នូរនឹងការបន្ធូរបន្ថយទណ្ឌកម្មរបស់អង្គការសហប្រជាជាតិ ព្រមទាំងសហរដ្ឋអាមេរិក និងសហភាពអឺរ៉ុប៕
