(ម៉ានីល)៖ ប្រធានាធិបតីហ្វីលីពីន លោក រ៉ូឌ្រីហ្គោ ឌូតឺតេ បានចេញមុខការពារ ការលើកឡើងដ៏ចម្រូងចម្រាស់របស់លោក បន្ទាប់ពី បានទទួលរងការរិះគន់យ៉ាងខ្លាំង ពីសំណាក់អ្នកកាន់សាសនាគ្រិស្ដនិកាយកាតូលិក នៅក្នុងប្រទេស ដែលចាត់ទុកលោក ឌូតឺតេ ថា «ជាមនុស្សល្ងង់បំផុត» ចំពោះការហៅ «ព្រះថាល្ងីល្ងឺ»។ នេះបើតាមការចេញផ្សាយដោយសារព័ត៌មាន Russian Today នៅរសៀលថ្ងៃអង្គារ ទី២៦ ខែមិថុនា ឆ្នាំ២០១៨។
យ៉ាងណាក៏ដោយ ថ្លែងនៅក្នុងសុន្ទរកថា នៅឯទីក្រុង កាហ្គាយ៉ាន ឌែអូរ៉ូ (Cagayan de Oro) នៅថ្ងៃចន្ទសប្ដាហ៍នេះ លោក ឌូតឺតេ បានអះអាងឡើងវិញថា មិនបានហៅព្រះរបស់លោកថា ល្ងីល្ងឺនោះទេ។ ប្រធានាធិបតីរូបនេះ បានឆ្លើយតបទៅនឹងអ្នករិះគន់ដូច្នេះថា «ខ្ញុំមិនបានថា ព្រះរបស់ខ្ញុំឆ្កួតឡប់នោះទេ។ ព្រះរបស់អ្នកមិនមែនជាព្រះរបស់ខ្ញុំទេ ពីព្រោះព្រះរបស់អ្នកគឺឆ្កួតល្ងីល្ងឺ ហើយព្រះរបស់ខ្ញុំគឺពោរពេញដោយសុភវិនិច្ឆ័យ។ ម្យ៉ាងវិញទៀត បើខ្ញុំជ្រើសរើសមិនជឿលើព្រះ តើវាមានបញ្ហាអ្វី? ដ្បិតវាគ្រាន់តែជាសិទ្ធិមួយក្នុងការជ្រើសរើសប៉ុណ្ណោះ»។
គួរបញ្ជាក់ថា ភាពចម្រូងចម្រាសរវាងលោក ឌូតឺតេ និងអ្នកកាន់សាសនាគ្រិស្ដនិកាយកាតូលិក កើតមានឡើងក្រោយប្រធានាធិបតី រូបនេះបានហៅព្រះថា ឆ្កួតល្ងីល្ងឺ ឆ្លើយតបទៅនឹងសំណួរក្នុងអំឡុងពេលថ្លែងសុន្ទរកថាមួយ តាមកញ្ចក់ទូរទស្សន៍ កាលពីថ្ងៃសុក្រសប្ដាហ៍មុន។ ពោលគឺនៅពេលត្រូវគេសួរពាក់ព័ន្ធនឹងព្រះគម្ពីប៊ីប (Bible) ស្ដីពីការបង្កើតមនុស្ស និងថាតើហេតុអ្វីបានជាព្រះបង្កើត អាដាម (Adam) និងនាង អេវ (Eve) តែបែរជាអនុញ្ញាតឱ្យអ្នកទាំងពីរនាក់នេះចុះចាញ់ ដោយសារតែការលួងលោមរបស់សាតាន់ រហូតដល់បំផ្លាញខ្លួនឯងទៅវិញ។
លោកឌូតឺតេ បានលើកឡើងថា «នរណាជាព្រះឆ្កួតល្ងីល្ងឺនេះ? កូនមី.... គឺពិតជាឆ្កួតបំផុត។ ដូច្នេះតើអ្នកអាចពន្យល់ពីព្រះបាន យ៉ាងដូចម្ដេច ហើយតើអ្នកជឿដែរឬទេ?»។ ប៉ុន្តែ នេះមិនមែនជាលើកទីមួយឡើយ ដែលលោកឌូតឺតេប្រើពាក្យមិនសមរម្យបែបនេះ ដោយលោកផ្ទាល់ក៏ធ្លាប់ប្រើពាក្យមិនគួរគប្បីលើអតីតប្រធានានាធិបតីអាមេរិក លោក បារ៉ាក់ អូបាម៉ា, ដូនជី ស្ត្រីជាប់ឃុំ និងសម្ដេចប៉ាបផងដែរ៕
