(ហាណូយ)៖ ទឹកជំនន់ និងគ្រោះរអិលបាក់ដីបង្កឡើង​ដោយការធ្លាក់ភ្លៀងធំ កាលពីអំឡុងចុង​សប្តាហ៍មុន នៅតាមបណ្តាខេត្តខ្ពង់រាបភាគ​ខាងជើង​វៀតណាម បានផ្តាច់ជីវិត​មនុស្សសរុបកើន​ដល់ ១៥នាក់ហើយ ខណៈ​១១នាក់ផ្សេង​ទៀតកំពុងបន្ត​បាត់ខ្លួន។ នេះបើ​តាមការដក​ស្រង់ការផ្សាយ​ចេញពី​ទីភ្នាក់ងារ​ព័ត៌មានចិន ស៊ីនហួរ នៅព្រឹក​ថ្ងៃអង្គារ ទី២៦ ខែមិថុនា ឆ្នាំ២០១៨។

បើតាមព័ត៌មានលម្អិតមនុស្ស ០៣នាក់ នៅខេត្តហាគាំង (Ha Giang) បានបាត់បង់ជីវិត ដោយសារផ្ទះរំលំសង្កត់ ១២នាក់ទៀត​នៅខេត្តឡៃចូវ (Lai Chau) បានស្លាប់​ដោយសារគ្រោះរអិលបាក់ដី រលំផ្ទះ និងទឹកជំនន់។ គិតមកត្រឹមព្រឹក​ថ្ងៃអង្គារនេះ មនុស្សសរុប ១១នាក់ ត្រូវ​បាន​​​​ចុះ​ក្នុងបញ្ជីជន​បាត់ខ្លួន ដោយពួកគេមានទីលំនៅក្នុងខេត្ត Lai Chau ក្នុងនោះមាន ០៧នាក់នៅស្រុកស៊ីនហូ (Sin Ho)។

គួរជម្រាបថា គ្រោះមហន្តរាយធម្មជាតិ​ខាងលើ ក៏បានបង្កឲ្យមនុស្ស ០៧នាក់រងរបួស នៅខេត្ត Lai Chau, បំផ្លាញផ្ទះ ៨៣ខ្នង, ធ្វើឲ្យ​ខូច​​ខាត​​ផ្ទះ ១,៤៧០ខ្នង, បំផ្លិចបំផ្លាញដី​ស្រែ និងចម្ការផ្សេងទៀត​សរុបជាង ១,២០០ហិកតា, សម្លាប់សត្វគោ-ក្របី ៩៧ក្បាល និងបក្សី​ចិញ្ចឹម​ ៥,៤០០​​​ក្បាល​​​, កាត់ផ្តាច់ស្ពាន, និងបង្កការ​កកស្ទះចរាចរណ៍​ធ្ងន់ធ្ងរ​ នៅលើផ្លូវជាតិ និងផ្លូវថ្នល់ធំៗ​ជាច្រើន។ ​

សរុបមក​​​​ ចាប់តាំងពី​ចុង​​សប្តាហ៍​កន្លងទៅ គ្រោះទឹកជំនន់ និងរអិលបាក់ដី នៅខេត្តទាំង០៧ភាគខាងជើងវៀតណាម បានបង្កការខាត​បង់ទ្រព្យសម្បតិ្ត​សាធារណៈ​​​​គិតជា​ទំហំ​​ទឹក​ប្រាក់​ប្រហែល​ ១៤១ពាន់លានដុង ស្មើនឹង ៦.២លានដុល្លារ៕