(ម៉ានីល)៖ ប្រធានាធិបតីហ្វីលីពីន លោក រ៉ូទ្រីហ្គោ ឌូតឺតេ បានទទួលរងការរិះគន់យ៉ាងខ្លាំង ពីសំណាក់អ្នកកាន់សាសនាគ្រិស្ដនិកាយ កាតូលិកនៅហ្វីលីពីន ដែលជាប្រទេសមានអ្នកជឿលើនិកាយមួយនេះធំជាងគេនៅអាស៊ី បន្ទាប់ពីលោកហៅព្រះថា «Stupid ឬ ឆ្កួតឡប់»។ នេះបើតាមការចេញផ្សាយដោយសារព័ត៌មាន TRT នៅព្រឹកថ្ងៃអង្គារ ទី២៦ ខែមិថុនា ឆ្នាំ២០១៨។
លោក ឌូតឺតេ បានបង្កភាពចម្រូងចម្រាស់សាជាថ្មីនៅក្នុងសុន្ទរកថាមួយ តាមកញ្ចក់ទូរទស្សន៍កាលពីថ្ងៃសុក្រ សប្ដាហ៍មុន។ ពោលគឺនៅក្នុងសុន្ទរកថានោះ នៅពេលដែលត្រូវគេសួរពាក់ព័ន្ធនឹងព្រះគម្ពីប៊ីប (Bible) ស្ដីពីការបង្កើតមនុស្ស និងថា តើហេតុអ្វីបានជាព្រះបង្កើត អាដាម (Adam) និងនាង អេវ (Eve) តែបែរជាអនុញ្ញាតឱ្យអ្នកទាំងពីរនាក់នេះចុះចាញ់ ដោយសារតែការលួងលោមរបស់សាតាន់ រហូតដល់បំផ្លាញខ្លួនឯងទៅវិញ។
ប៉ុន្តែជាការឆ្លើយតប ប្រធានាធិបតីហ្វីលីពីនរូបនេះ បានបង្កើតភាពចម្រូងចម្រាសយ៉ាងខ្លាំងនៅក្នុងប្រទេស ដោយលើកឡើងដូច្នេះ ថា «នរណាជាព្រះឆ្កួតល្ងីល្ងឺនេះ? កូនមី.... គឺពិតជាឆ្កួតបំផុត។ ដូច្នេះតើអ្នកអាចពន្យល់ពីព្រះបានយ៉ាងដូចម្ដេច ហើយតើអ្នកជឿដែរឬទេ?»។
គួរបញ្ជាក់ថា ក្រៅពីជេរដៀលចំពោះព្រះជាម្ចាស់ លោក ឌូតឺតេ ក៏ធ្លាប់បានប្រើពាក្យប្រមាថលើអតីតប្រធានានាធិបតីអាមេរិក លោក បារ៉ាក់ អូបាម៉ា, ដូនជី ស្ត្រីជាប់ឃុំ និងសម្ដេចប៉ាបផងដែរ៕
