(វ៉ាស៊ីនតោន)៖ រដ្ឋមន្ត្រីការពារជាតិអាមេរិក លោក ចេមស៍ ម៉ាត់ទីស (James Mattis) នឹងបំពេញដំណើរទស្សកិច្ចជាលើកដំបូងរបស់លោក ទៅកាន់ទីក្រុងប៉េកាំង នៅក្នុងសប្ដាហ៍នេះ ខណៈភាពតានតឹងរវាងប្រទេសទាំងពីរកំពុងកើនឡើង ហើយសហរដ្ឋអាមេរិកត្រូវការការគាំទ្រពីចិនជាចំាបាច់ ដើម្បីរំសាយអាវុធនុយក្លេអ៊ែរកូរ៉េខាងជើង។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅរសៀលថ្ងៃចន្ទ ទី២៥ ខែមិថុនា ឆ្នាំ២០១៨។
ជាមួយគ្នានោះដែរ ថ្លែងនៅចំពោះមុខអ្នកសារព័ត៌មានកាលពីថ្ងៃអាទិត្យ (ម៉ោងនៅអាមេរិក) លោក Mattis ចង់ចាត់វិធានការលើ មហិច្ឆតាយុទ្ធសាស្ត្ររបស់ចិន ជុំវិញការដាក់ពង្រាយបរិក្ខាយោធា នៅឯតំបន់ជម្លោះក្នុងសមុទ្រចិនខាងត្បូង និងការពង្រីកឥទ្ធិពលនៅតំបន់ប៉ាស៊ីហ្វិក។ តែយ៉ាងណាក៏ដោយ ក្នុងដំណើរទស្សនកិច្ចរយៈពេល ០៤ថ្ងៃ ក្នុងនោះរួមមានទាំងប្រទេសកូរ៉េខាងត្បូង និងជប៉ុន ប្រមុខមន្ទីរបញ្ចកោណរូបនេះ នៅតែអះអាងដដែលពីក្ដីសង្ឃឹមថា នឹងទទួលបានការប្ដេជ្ញាចិត្តពីចិន ក្នុងការដាក់សម្ពាធឱ្យកូរ៉េខាងជើង បោះចោលអាវុធនុយក្លេអ៊ែរ ក្រោយជំនួបជាប្រវត្តិសាស្ត្ររវាងលោក ដូណាល់ ត្រាំ និងលោក គីម ជុនអ៊ុន ក្នុងប្រទេសសិង្ហបុរី កាលពី ថ្ងៃទី១២ ខែមិថុនាកន្លងទៅ។
គួរបញ្ជាក់ថា លោក James Mattis នឹងផ្ដើមទស្សនកិច្ចនៅក្នុងទីក្រុងប៉េកាំង ពីថ្ងៃអង្គារដល់ថ្ងៃព្រហស្បតិ៍ ដើម្បីជួបពិភាក្សាជាមួយមន្ត្រីយោធាជាន់ខ្ពស់ចិន មុននឹងបន្តដំណើរទៅកាន់ទីក្រុងសេអ៊ូល ជួបជាមួយរដ្ឋមន្ត្រីការពារជាតិកូរ៉េខាងត្បូង លោក សុង យាំងមូ (Song Young-moo) ព្រមទាំងជួបជាមួយរដ្ឋមន្ត្រីការពារជាតិជប៉ុនលោក អ៊ីតស៊ូណូរី អូណូឌែរ៉ា (Itsunori Onodera) នៅថ្ងៃសុក្រ។
បន្ថែមពីលើនេះ នៅក្នុងជំនួបជាមួយសមភាគីជប៉ុន និងកូរ៉េខាងត្បូង លោក Mattis ក៏ត្រូវបានគេរំពឹងផងដែរនឹងធានាពីការពារសុវត្ថិភាពចំពោះទីក្រុងសេអ៊ូល និងទីក្រុងតូក្យូ ក្រោយទីក្រុងវ៉ាស៊ីនតោនប្រកាសផ្អាកការធ្វើសមយុទ្ធយោធារួមគ្នាទ្រង់ទ្រាយធំ ជាមួយកូរ៉េខាងត្បូង៕
