(សេអ៊ូល)៖ កូរ៉េខាងត្បូង និងកូរ៉េខាងជើង បានចាប់ផ្តើមកិច្ចពិភាក្សាថ្នាក់ស្ថាប័នកាកបាតក្រហម ដើម្បីជជែកពីបញ្ហាមនុស្សធម៌ រួមមានការរៀបចំឲ្យជួបជុំគ្នានៃក្រុមគ្រួសារកូរ៉េ ដែលបានបែកបាក់កាលពីសម័យសង្រ្គាមកូរ៉េជាដើម។ នេះបើតាមសេចក្តីប្រកាសរបស់ ក្រសួងបង្រួបបង្រួមកូរ៉េខាងត្បូង ដកស្រង់ខ្លឹមសារដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសុក្រ ទី២២ ខែមិថុនា ឆ្នាំ២០១៨។
គណៈប្រតិភូមកពីភាគីទាំងសងខាង បានចាប់ផ្តើមកិច្ចពិភាក្សាខាងលើ នៅព្រឹកថ្ងៃសុក្រនេះ តាមការគ្រោងទុកនៅឯសណ្ឋាគារមួយកន្លែង ដែលស្ថិតនៅលើភ្នំទេសចរណ៍ គុមហ្គាង (Kumgang) របស់ប្រទេសកូរ៉េខាងជើង។ ក្រុមមន្រ្តីកូរ៉េខាងត្បូង បានធ្វើដំណើរទៅកាន់ទីតាំងជំនួប តាមផ្លូវគោកមួយខ្សែ នៅតំបន់ភាគខាងកើត។
គួរជម្រាបថា ប្រធានបទស្នូលនៅលើតុពិភាក្សា គឺការរៀបចំការជួបជុំនៃក្រុមគ្រួសារ ដែលបានព្រាត់ប្រាស់គ្នា។ ប្រធានាធិបតីកូរ៉េខាងត្បូង លោក មូន ជែអ៊ីន និងប្រមុខដឹកនាំកំពូលកូរ៉េខាងជើង លោក គីម ជុងអ៊ុន បានព្រមព្រៀងគ្នារៀបចំការជួបជុំក្រុមគ្រួសារកូរ៉េ នៅខ្ទង់ថ្ងៃទី១៥ ខែសីហា ឆ្នាំនេះ បន្ទាប់ពីមេដឹកនាំទាំងពីរបានបើកកិច្ចប្រជុំកំពូលលើកទីមួយ កាលពីថ្ងៃទី២៧ ខែមេសាកន្លងទៅ៕
