(តូក្យូ)៖ ការស្ទង់មតិមួយរបស់សមាគមជាតិ នៃសេវាថែទាំងសុខភាពជប៉ុនបានឱ្យដឹងថា គិលានុបដ្ឋាយិកាបម្រើសេវាមើលថែជំងឺដល់ផ្ទះ ជាងពាក់កណ្ដាល បានអះអាងថា ពួកគេបានទទួលការរំលោភពាន ឬការបៀតបៀនមួយចំនួនពីសំណាក់អ្នកជំងឺរបស់ខ្លួន។ នេះបើ តាមការចេញផ្សាយដោយទីភ្នាក់ងារសារព័ត៌មានចិន ស៊ីនហួរ នៅល្ងាចថ្ងៃព្រហស្បតិ៍ ទី២១ ខែមិថុនា ឆ្នាំ២០១៨។
យោងតាមការស្ទង់មតិរបស់សមាគមខាងលើ ចំនួនគិលានុបដ្ឋាយិកាមើលថែអ្នកជំងឺតាមផ្ទះ បានកើនឡើងខ្ពស់គួរឱ្យកត់សម្គាល់ ហើយមនុស្សចាស់មួយចំនួន ពេញចិត្តនឹងទទួលសេវាកម្មមើលថែនេះ នៅក្នុងផ្ទះរបស់ខ្លួនឯង ដែលនេះមានន័យថា គិលានុបដ្ឋាយិកាម្នាក់ត្រូវទៅផ្ទះអ្នកជំងឺតែម្នាក់ឯង។
ដោយឡែក នៅក្នុងការសាកសួរគិលានុបដ្ឋាយិកា ១១,១៦០នាក់ ពាក់ព័ន្ធនឹងការបៀតបៀនផ្លូវភេទ នៅចន្លោះពីខែកុម្ភៈ និងខែមីនា អ្នកទាំងនេះជាងពាក់កណ្ដាលបានឆ្លើយថា «មាន»។ លើសពីនេះទៅទៀត ៥៣ភាគរយបានឆ្លើយថា ពួកគេត្រូវបានអ្នកជំងឺបៀតបៀនខាងផ្លូវចិត្ត, ៤៥ភាគរយផ្លូវកាយ និង ៤៨ភាគរយទៀតអះអាងថា «ទទួលរងការរំលោភបំពានផ្លូវភេទ»។
គួរបញ្ជាក់ថា បើតាមការស្ទង់មតិខាងលើដដែល រាល់ការបៀតបៀនគ្រប់ទម្រង់ទាំងអស់ មាន ៣០ភាគរយឆ្លើយថា ពួកគេរងការឈឺចាប់ពីការរំលោភបំពានទាំងនេះកាលពីឆ្នាំមុន ខណៈអ្នកផ្សេងទៀតថា ត្រូវបានអ្នកជំងឺស្រែកគំហក ស្ទាបអង្អែល និងបង្ខំឱ្យពួកគេ មើលវិដេអូអាសអាភាសទៀតផង៕
