(ម៉ូស្គូ)៖ អតីតនាយករដ្ឋមន្ត្រីស៊ុយអែត លោក ខាល ប៊ីលត៍ (Carl Bildt) បានសម្ដែងការមិនពិតចិត្តជាខ្លាំង ទៅនឹងការបង្ហោះសាររិះគន់ជាបន្តបន្ទាប់ ប្រឆំាងនឹងអឺរ៉ុបរបស់លោក ដូណាល់ ត្រាំ ដោយចាត់ទុកថា ប្រធានាធិបតីអាមេរិករូបនេះ គឺអាក្រក់ជាងប្រធានាធិបតីរុស្ស៊ីលោក វ្ល៉ាឌីមៀ ពូទីន ទៅទៀតក្នុងបង្កអស្ថេរភាពដល់អឺរ៉ុប។ នេះបើតាមការចេញផ្សាយដោយសារព័ត៌មាន Sputnik នៅរសៀលថ្ងៃពុធ ទី២០ ខែមិថុនា ឆ្នាំ២០១៨។
ថ្លែងនៅលើ Twitter រិះគន់បណ្ដាប្រទេសអឺរ៉ុបមួយចំនួន ជាពិសេសគឺអាល្លឺម៉ង់នាពេលថ្មីៗនេះ លោក ដូណាល់ ត្រាំ បានចាត់ទុកថា គោលនយោបាយអន្តោប្រវេសន៍អឺរ៉ុប បច្ចុប្បន្នគឺជាគ្រោះមហន្តរាយមួយ។ ប៉ុន្តែជាការឆ្លើយតប លោក Bildt បានលើកឡើងនៅលើ Twitter យ៉ាងដូច្នេះថា «និយាយពីរឿងបង្កអស្ថេរភាពដល់អឺរ៉ុប គេតែងតែសំដៅទៅលើលោក ពូទី ប៉ុន្តែនៅពេលនេះលោក ដូណាល់ ត្រាំ គឺអាក្រក់ខ្លាំងជាងប្រធានាធិបតីរុស្ស៊ីទៅទៀត ក្នុងបង្កអស្ថេរភាពដល់អឺរ៉ុប»។
គួរជម្រាបថា ប្រតិកម្មរបស់លោក Carl Bildt កើតមានឡើងបន្ទាប់ពីលោក ដូណាល់ ត្រាំ បានបង្ហោះសារលើ Twitter កាលពីប៉ុន្មានថ្ងៃមុនថា បទឧក្រិដ្ឋនៅក្នុងប្រទេសអាល្លឺម៉ង់ កំពុងមានការកើនឡើង ហើយថាការអនុញ្ញាតឱ្យជនភៀសខ្លួនរាប់លាននាក់ ចូលក្នុងអឺរ៉ុបគឺជាកំហុសឆ្គងមួយដ៏ធំ៕
