(យូអិន)៖ អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គួទែរែស (Antonio Guterres) បានអំពាវនាវឱ្យសហរដ្ឋអាមេរិក បន្តស្ថិតនៅជាសមាជិកនៃក្រុមប្រឹក្សាសិទ្ធិមនុស្ស UN បន្ទាប់ទីក្រុងវ៉ាស៊ីនតោនប្រកាសដកខ្លួនចេញពីស្ថាប័នមួយនេះ ដែលមានស្នាក់ការនៅទីក្រុងហ្សឺណែវ ប្រទេសស្វីស។ នេះបើតាមអ្នកនាំពាក្យលោក Guterres ដកស្រង់ដោយសារព័ត៌មានបារាំង Le Figaro នៅរសៀលថ្ងៃពុធ ទី២០ ខែមិថុនា ឆ្នាំ២០១៨។
ការដកសហរដ្ឋអាមេរិកចេញពីក្រុមប្រឹក្សាសិទ្ធិមនុស្ស UN ដែលមានសមាជិកចំនួន ៤៧ ត្រូវបានប្រកាសដោយលោកស្រី នីកគី ហាឡេយ៍ (Nikki Haley) នៅថ្ងៃអង្គារសប្ដាហ៍នេះ ដោយលោកស្រីចោទប្រកាន់ត្រង់ៗថា ស្ថាប័នមួយនេះមានភាពលម្អៀង ពុតត្បត់ និងបម្រើតែផលប្រយោជន៍ខ្លួនឯង។ ប៉ុន្តែជុំវិញបញ្ហានេះដែរ នៅក្នុងសេចក្ដីថ្លែងការណ៍របស់អ្នកនាំពាក្យលោក Guterres គឺលោក ស្ទេហ្វិន ឌូហ្សារិច (Stephane Dujarric) បានឱ្យដឹងថា លោកអគ្គលេខាធិការ UN បានអំពាវនាវឱ្យសហរដ្ឋអាមេរិកបន្តស្ថិតនៅជាសមាជិកឧត្តមក្រុមប្រឹក្សាសិទ្ធិមនុស្ស UN ដោយសារតែស្ថាប័នមួយនេះ បានដើរតួយ៉ាងសំខាន់ក្នុងការលើកកម្ពស់សិទ្ធិមនុស្ស នៅលើពិភពលោក។
ចំណែកឯ អង្គការឃ្លាំងមើលសិទ្ធិមនុស្ស Human Rights Watch ក៏បានសម្ដែងការសោកស្ដាយ ចំពោះការប្រកាសដកខ្លួនរបស់ទីក្រុងវ៉ាស៊ីនតោននេះដែរ ដោយបញ្ជាក់ថា ការដកខ្លួននេះនឹងធ្វើឱ្យសហរដ្ឋអាមេរិក ស្ថិតនៅខាងក្រៅគំនិតផ្ដួចផ្ដើមការពារសិទ្ធិមនុស្ស នៅលើពិភពលោក។
គួរបញ្ជាក់ថា ការប្រកាសរបស់លោកស្រី Nikki Haley ធ្វើឡើងតែមួយថ្ងៃប៉ុណ្ណោះ បន្ទាប់ពីឧត្ដមស្នងការទទួលបន្ទុកសិទ្ធិមនុស្ស UN លោក Zeid Ra'ad Al Hussein បានចេញមុខថ្កោលទោល ចំពោះគោលនយោបាយគ្មានត្រាប្រណីលើជនអន្តោប្រវេសន៍ មកពីមិចស៊ីកូរបស់ប្រធានាធិបតីអាមេរិក លោក ដូណាល់ ត្រាំ ដែលបានបំបែកបំបាក់កុមារជាង ២,០០០នាក់ ចេញពីឪពុកម្ដាយ របស់ពួកគេដែលត្រូវបានអាជ្ញាធរអាមេរិកចាប់ឃុំខ្លួន។
តែយ៉ាងណាក៏ដោយ នាយករដ្ឋមន្ត្រីអ៊ីស្រាអែល លោក ប៊ិនចាមីន ណឺតាន់យ៉ាហ៊ូ (Benjamin Netanyahu) បានអរគុណសហរដ្ឋអាមេរិកយ៉ាងខ្លាំងចំពោះ ការប្រកាសដកខ្លួននេះ។ មួយវិញទៀត គិតចាប់តាំងពីលោក ដូណាល់ ត្រាំ ជាប់ឆ្នោតជាប្រធានាធិបតីអាមេរិកមក សហរដ្ឋអាមេរិកក៏បានប្រកាសដកខ្លួនចេញពីអង្គការ Unesco កិច្ចព្រមព្រៀងស្ដីពីបម្រែបម្រូលអាកាសធាតុទីក្រុងប៉ារីស ព្រមទាំងកិច្ចព្រមព្រៀង ពាណិជ្ជកម្ម TTP និងកិច្ចព្រមព្រៀងនុយក្លេអ៊ែរអ៊ីរ៉ង់ផងដែរ៕
