(ហ្សាការតា)៖ ទីភ្នាក់ងារ​ស្វែងរក និងជួយសង្រ្គោះ​ឥណ្ឌូណេស៊ី បានឱ្យដឹងនៅ​ថ្ងៃពុធនេះ​ថា ចំនួនមនុស្ស​បាត់ខ្លួន​បន្ទាប់ពីទូកដឹក អ្នកដំណើរមួយ​គ្រឿងក្រឡាប់​លិច​នៅឯបឹង តូបា (Toba) ស្ថិតក្នុងខេត្តស៊ូម៉ាត្រាខាងជើង នៃភាគខាងលិច​​ប្រទេសឥណ្ឌូណេស៊ី​​កាលពី​ថ្ងៃចន្ទ បានកើនដល់ ១៨០នាក់ហើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅព្រឹកថ្ងៃពុធ ទី២០ ខែមិថុនា ឆ្នាំ២០១៨។

មន្ត្រីជួយ​សង្រ្គោះម្នាក់​បានបា្រប់ Reuters យ៉ាងដូច្នេះថា «ផ្អែកលើ​ព័ត៌មាន​ដែលយើងទទួល​បាន មនុស្សយ៉ាង​ហោច​ណាស់ ១៨០នាក់ បានបាត់ខ្លួន ខណៈយើង​កំពុងបន្តប្រតិបត្តិការ​ជួយសង្រ្គោះ និងតាម​ស្វែងរក»។ មន្ត្រីនេះ​ដដែល បន្ថែមថា មនុស្ស ១៨នាក់ ត្រូវបាន​ជួយសង្រ្គោះ ហើយសាកសព​មនុស្សពីរនាក់​ត្រូវគេស្រង់ចេញ​ពីទឹក។ ប៉ុន្តែ មិនបាន​បញ្ជាក់លម្អិត​ពីមូលហេតុ​នៃគ្រោះថ្នាក់ និង ចំនួនអ្នក​ដំណើរជិះនៅលើទូក​ដែលលិចនោះទេ ដោយគ្រាន់​តែគេដឹងថា ទូកនេះអាច​ផ្ទុកមនុស្ស​ត្រឹម ៦០នាក់ប៉ុណ្ណោះ។
គួរបញ្ជាក់ថា កាលពីដំបូង​ឡើយអាជ្ញាធរឥណ្ឌូណេស៊ីបានអះអាងថា មនុស្ស ១២៨នាក់​បានបាត់ខ្លួន នៅក្នុងហេតុការណ៍​លិចទូកខាង​លើ ដែលបានធ្វើដំណើរ​ចាកចេញពី​កំពង់ផែ ស៊ីម៉ានីនដូ (Simanindo) ក្នុងស្រុក សាម៉ូស៊ឺ (Samosir) ឆ្ពោះទៅកាន់តំបន់ ទីហ្គារ៉ាស ផារ៉ាផាត (Tigaras Parapat) នៃស្រុក ស៊ីម៉ាឡាំងហ្គាន់ (Simalungun)៕