(សេអ៊ូល)៖ កូរ៉េខាងត្បូង និង​សហរដ្ឋអាមេរិក​បានសម្រេច​ចិត្តផ្អាក​ការធ្វើ​សមយុទ្ធ​យោធា​រួមគ្នា Ulchi Freedom Guardian (UFG) ដែលគ្រោង​នឹងធ្វើឡើង​នៅ​​ខែសីហាខាងមុខនេះហើយ ក្រោយប្រធានាធិបតីអាមេរិក លោក​ ដូណាល់ ត្រាំ បានសន្យាថា​នឹងបញ្ឈប់ការ ធ្វើសមយុទ្ធយោធា​​ដែលកន្លង​មក វាគឺជាការសម្ញែងសាច់ដុំដាក់​កូរ៉េខាងជើងនោះ។ នេះបើតាម​ក្រសួងការពារ​ជាតិ​កូរ៉េខាងត្បូង ដកស្រង់ដោយ​ទីភ្នាក់ងារ សារព័ត៌មាន​ចិន ស៊ីនហួរ នៅព្រឹកថ្ងៃអង្គារ ទី១៩ ខែ​ឧសភា ឆ្នាំ២០១៨។

នៅ​ក្នុងសេចក្ដីថ្លែងការណ៍របស់ខ្លួន ក្រសួងការពារជាតិ​កូរ៉េខាងត្បូងបានគូស​បញ្ជាក់​យ៉ាងដូច្នេះថា «កូរ៉េខាងត្បូង​ និង​សហរដ្ឋអាមេរិក បានព្រមព្រៀងគ្នា​ផ្អាករាល់​សកម្មភាព​នានា ដែលបានគ្រោងទុក នៅក្នុងការធ្វើ​សមយុទ្ធ​យោធា Ulchi Freedom Guardian នៅ​ខែសីហា ខាងមុខនេះ»

ដោយឡែក អ្នកនាំពាក្យ​មន្ទីរបញ្ចកោណអាមេរិក លោកស្រី ដាណា វ៉ៃត៍ (Dana White) ក៏បានទទួលស្គាល់ការផ្អាកនេះដែរ ដោយបន្ថែមថា នឹងមានកិច្ចពិភាក្សាមួយ​រវាងរដ្ឋមន្ត្រី​ការពារជាតិ និងទីប្រឹក្សាសន្ដិសុខជាតិ​របស់លោក ដូណាល់ ត្រាំ ស្ដីពីបញ្ហានេះ​នៅក្នុង សប្ដាហ៍​នេះ។ លោកស្រី បានលើក​ឡើងដូច្នេះថា «យើងនឹងនៅ​តែបន្តសម្រប​សម្រួល​សកម្មភាព​បន្ថែម... ប៉ុន្តែពុំទាន់​មាន​ការសម្រេច ចិត្តណាមួយ​លើសមយុទ្ធយោធា​រួមគ្នា​ដទៃទៀត​ឡើយ»

គួរជម្រាបថា បើតាមទីក្រុង​វ៉ាស៊ីនតោន ការផ្អាកសមយុទ្ធ​យោធានេះ គឺផ្ដោតសំខាន់​តែទៅលើសមយុទ្ធយោធា​ទ្រង់ទ្រាយធំ​តែប៉ុណ្ណោះ ហើយសមយុទ្ធយោធានោះ​ អាចចាប់ផ្ដើមធ្វើឡើង​វិញគ្រប់ពេលវេលា បើសិនជា​កូរ៉េខាងជើង មិនគោរពតាម​សន្យារបស់ខ្លួន ក្នុងការរំសាយ​អាវុធ​នុយក្លេអ៊ែរ៕