(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ បាននិយាយថា លោកមាន​បំណងចង់ឲ្យ​ប្រជាជន​អាមេរិក គោរពរូប​លោក​ ដូចទៅ​នឹងរបៀបដែល​ប្រជាជន​កូរ៉េខាងជើង ធ្វើចំពោះ​មេដឹកនាំ​របស់ពួកគេ គឺលោក គីម ជុងអ៊ុន ដែរ ខណៈសម្តីនេះ​ហាក់ដូចជាការនិយាយ​លេង​សើចក៏ដោយក្តី ប៉ុន្តែវាបានបង្ក​ឲ្យមានការមិនពេញចិត្តជា​ខ្លាំង នៅលើបណ្តាញសង្គម និងបណ្តាញ​សារព័ត៌មាន​​ក្នុងស្រុក។ នេះ​បើ​តាម​ការ​​ដក​ស្រង់​​ការ​ផ្សាយ​ចេញពី សារព័ត៌មានចិន CGTN នៅល្ងាច​ថ្ងៃសៅរ៍ ទី១៦ ខែមិថុនា ឆ្នាំ២០១៨។

លោក ដូណាល់ ត្រាំ ត្រូវបានចោទ​សួរសំណួរ នៅអំឡុងការ​ផ្តល់បទសម្ភាសន៍​មួយ ជាមួយសារព័ត៌មាន Fox News នៅក្រៅ​សេតវិមានថា ​តើលោកនឹង​អញ្ជើញលោក គីម ជុងអ៊ុន មកសេតវិមាន​មែនដែរ ឬអត់។ លោក ត្រាំ បានឆ្លើយ​តបវិញថា «គាត់ (លោក គីម) គឺជាប្រមុខរដ្ឋមួយ​រូបរបស់ប្រទេស​មួយ» ដែលជា​តំរុយថា ការអញ្ជើញ​លោក គីម ជុងអ៊ុន មកធ្វើទស្សនកិច្ច​នៅសេតវិមាន គឺអាច​ទៅរួច។ ក្នុងឱកាស​នោះ លោក ត្រាំ បានបន្តថា «នៅពេល​គាត់ (លោក គីម) និយាយអ្វី ប្រជាជន​របស់គាត់សម្តែង​ការគោរព និងផ្តោតការយកចិត្ត​ទុកដាក់ជាខ្លាំង​​​ដើម្បី​ស្តាប់​។ ខ្ញុំក៏ចង់ឲ្យ​ប្រជាជនរបស់​ខ្ញុំធ្វើយ៉ាង​ដូច្នោះ​ដែរ​​»

គួរជម្រាបថា នៅពេលត្រូវ​ក្រុមអ្នកសារព័ត៌មាន ស្នើឲ្យបកស្រាយឲ្យច្បាស់​ពីអត្ថន័យ នៃការអធិប្បាយ​ខាងលើរបស់់ខ្លួន លោក ត្រាំ បានលើក​ឡើងថា វាគ្រាន់តែ​ជាការនិយាយលេង​សើច​ប៉ុណ្ណោះ ហើយ​បន្ទាប់​ទៀតអ្នកនាំពាក្យ​សេតវិមាន ក៏បានចេញមុខ​ការពារលោក​​ប្រធានាធិបតី​ផងដែរ។ យ៉ាង​ណា​មិញ មហាជន​​អាមេរិក បានលើក​ឡើងថា ការពោល​ពាក្យបែបនេះ ហាក់ដូចជា​បានបង្ហាញថា លោក ត្រាំ ឲ្យតម្លៃទៅលើ​ទង្វើផ្តាច់ការ​អ៊ីចឹង ខណៈអ្នកវិភាគ​មួយចំនួន បាន​បញ្ជាក់ថា មានប្រធានបទខ្លះ ​ក្នុងនាមជាប្រធានាធិបតី​អាមេរិក គឺមិនគួ​រ​និយាយលេង​សើចឥតប្រយោជន៍​ឡើយ៕​​​​