(តូក្យូ)៖ រដ្ឋាភិបាល​ជប៉ុន​កំពុងធ្វើការងារ​ លើការរៀបចំជំនួប​រវាងនាយករដ្ឋមន្ត្រី លោក ស៊ីនហ្សូ អាបេ និងមេដឹកនាំ​កំពូលកូរ៉េខាងជើង លោក គីម ជុងអ៊ុន ជាមួយការបង្កើត​លទ្ធភាពមួយ ក្នុងនោះរួមមាន​ទាំងការបំពេញ​ដំណើរទស្សនកិច្ច​របស់លោក អាបេ ទៅកាន់ ទីក្រុង​ព្យុងយ៉ាង នៅអំឡុងខែសីហា​ខាងមុខនេះ។ នេះបើតាម​ការចេញផ្សាយ​ដោយសារព័ត៌មាន​ជប៉ុន Yomiuri នៅព្រឹកថ្ងៃព្រហស្បតិ៍ ទី១៤ ខែមិថុនា ឆ្នាំ២០១៨។

ដោយផ្អែកលើ​ប្រភពជាច្រើននៅក្នុងជួររដ្ឋាភិបាល​ជប៉ុន សារព័ត៌មាន Yomiuri បានបញ្ជាក់​ទៀតថា ក្រុមមន្ត្រី​ជប៉ុន និង​កូរ៉េខាងជើង​បានទាក់ទងគ្នា​ជាច្រើនដង​នាពេលថ្មីៗនេះ ដើម្បីបើក​កិច្ចចរចាស្ដីពីលទ្ធភាព រៀបចំ​ជំនួបរវាងមេដឹកនាំ​នៃប្រទេស​ទាំងពីរ។ បន្ថែមពី​លើនេះ Yomiuri ក៏បានឱ្យ​ដឹងដែរថា បើសិនជាដំណើរទស្សនកិច្ច​របស់លោក អាបេ ទៅកាន់​ទីក្រុងព្យុងយ៉ាង​មិនអាច​ធ្វើទៅរួច​ជប៉ុន នឹងសម្លឹងមើល​លើសេណារីយ៉ូ​ផ្សេងទៀត សម្រាប់ជំនួប អាបេ-​គីម នៅក្នុងកិច្ច​ប្រជុំវេទិកាសេដ្ឋកិច្ច​ខាងកើត ដែលគ្រោង​នឹងប្រព្រឹត្ត ទៅនៅខែកញ្ញា​ខាងមុខនេះ ក្នុងទីក្រុង វ្ល៉ាឌីវ៉ូស្តូក (Vladivostok) ប្រទេសរុស្ស៊ី ក្នុងករណី​លោក គីម ជុងអ៊ុន ចូលរួមក្នុង​កិច្ចប្រជុំ​នេះដែរ។​

តែយ៉ាងណា​ក៏ដោយ មកទល់ពេលនេះខាង​រដ្ឋាភិបាលជប៉ុន មិនទាន់ទទួល​ស្គាល់សេចក្ដីរាយការណ៍​នេះទេ ខណៈគេក៏មិនទាន់​ដឹង ច្បាស់នៅឡើយ​ដែរថា លោក ​អាបេ នឹងចូលរួមក្នុងកិច្ច​ប្រជុំនៅ​ឯទីក្រុង Vladivostok នៅខែកញ្ញា ឬក៏យ៉ាងណា នៅពេល​ដែល គណបក្ស​សេរីប្រជាធិបតេយ្យ​របស់លោក​ត្រូវរៀបចំ​ការប្រកួត​ប្រជែង​ ជ្រើសរើស​ថ្នាក់ដឹកនាំ​ថ្មី៕