(ប៉ារីស)៖ ហេតុការណ៍ផ្ទុះ​យ៉ាងកក្រើក នៅក្រុង Strasbourg ភាគខាងកើត​នៃប្រទេសបារាំង​នាថ្ងៃពុធនេះ គឺជាការផ្ទុះកន្លែង​ស្តុកទិន្ន​ផល​​កសិកម្ម​ដ៏​ធំ​មួយ។ នេះបើតាម​សេចក្តីរាយការណ៍​ព័ត៌មាន​ក្នុងស្រុករបស់​បារាំង ដកស្រង់ខ្លឹមសារ​ដោយ​សារព័ត៌មានចិន CGTN នៅល្ងាច​ថ្ងៃពុធ ទី០៦ ខែមិថុនា ឆ្នាំ២០១៨។

គួរជម្រាបថា ហេតុការណ៍​ខាងលើនេះ បានកើតឡើងចេញ​ពីឡស្តុក​គ្រាប់ធុញ្ញជាតិ នៅក្នុងតំបន់​ផែន Port-du-Rhin នៃទីក្រុង Strasbourg ដែលបានបង្ក​ឲ្យជាអណ្តាតភ្លើង​ និងផ្សែង​ខ្មៅយ៉ាង​ធំសម្បើម។ ឆ្លើយតបនឹង​ហេតុការណ៍នេះ ភ្នាក់ពន្លត់អគ្គិភ័យ​​ប្រមាណ ៧០នាក់ បាន​ទៅ​ដល់កន្លែងកើតហេតុ​ដើម្បីគ្រប់គ្រង់​ស្ថានការណ៍ ខណៈមូលហេតុ​ជាក់លាក់នៅ​ពីក្រោយ​ការផ្ទុះនេះ នៅពុំទាន់ត្រូវបាន​ដឹងច្បាស់នៅ​ឡើយ​ទេ៕