(វ៉ាស៊ីនតោន)៖ ជំនួយការ​ពិសេសសេតវិមាន​ របស់ប្រធានាធិបតីអាមេរិក លោក ដូណាល់ ត្រាំ គឺលោកស្រី ឃែលលី សេដ្លឺ (Kelly Sadler) បាន សម្រេចចិត្តលាលែងពីការងារហើយ បន្ទាប់ពីទទួលរងការរិះគន់យ៉ាង​ខ្លាំង​ ដោយសារតែការ​និយាយចំអក​​ពាក់ព័ន្ធនឹងជំងឺ​មហារីក របស់សមាជិក​ព្រឹទ្ធសភា​អាមេរិក លោក ចន ម៉ាកខេន (John McCain)។ នេះបើតាម​អ្នកនាំពាក្យ​សេតវិមាន ដកស្រង់​ដោយ​សារព័ត៌មាន BBC​ នៅរសៀលថ្ងៃពុធ ទី០៦ ខែមិថុនា ឆ្នាំ២០១៨។

ថ្លែងប្រាប់ BBC​ អ្នកនាំពាក្យ​សេតវិមាន​លោក លោក រ៉ាច ហ្សាហ៍ (Raj Shah) បានឱ្យដឹង​យ៉ាង​ដូច្នេះថា «លោកស្រី Kelly Sadler នឹងលែង​ក្លាយជា បុគ្គលិកការិយាល័យ​ប្រតិបត្តិ​ របស់លោក​ប្រធានាធិបតី ត្រាំ ទៀតហើយ»។ តំណឹង​លាលែងពី​តំណែងនេះ កើតមានឡើង​​ក្រោយ​លោកស្រី Sadler បាននិយាយចំអកដាក់លោក McCain ថា ការបោះឆ្នោត​ជំទាស់របស់លោក​មិនមានបញ្ហាអ្វី​នោះទេ ពីព្រោះគាត់ នឹងមិនអាចរស់​នៅបានយូរ​ឡើយ។

គួរបញ្ជាក់ថា ការលើកឡើង​ខាងលើរបស់​លោកស្រី Sadler ធ្វើឡើងនៅអំឡុង​កិច្ចប្រជុំមួយ​ទាក់ទិន​នឹងនាយក CIA លោកស្រី ជីណា ហាសភែស (Gina Haspel) ដែលលោក McCain​ បានបោះឆ្នោតជំទាស់​នឹងការតែងតាំង​លោកស្រី។ លោក McCain មាន​អាយុ ៨១ឆ្នាំ ត្រូវបាន​គេធ្វើរោគវិនិច្ឆ័យ​រកឃើញថា មានជំងឺមហារីក​ខួរក្បាល​ដ៏កម្រមួយ ដែលមានភាព​ស្មុគស្មាញ​ក្នុងការ​ព្យាបាល៕