(វ៉ាស៊ីនតោន)៖ ប្រធានាធិបតី​អាមេរិក លោក ដូណាល់ ត្រាំ និងប្រមុខដឹកនាំ​កំពូល​កូរ៉េខាងជើង លោក គីម ជុងអ៊ុន នឹងត្រូវជួប​មុខគ្នា​នៅឯ​សណ្ឋាគារ ខាភែលឡា (Capella Hotel) ស្ថិតនៅ​លើកោះ សេនតូសា (Sentosa) នៃប្រទេស​សិង្ហបុរី។ នេះបើតាម​ការឲ្យដឹងពី​សេតវិមាន ដកស្រង់ខ្លឹមសារ​ដោយទីភ្នាក់ងារ​ព័ត៌មានចិន ស៊ីនហួរ នៅរសៀលថ្ងៃទី០៦ ខែមិថុនា ឆ្នាំ២០១៨។

អ្នកនាំពាក្យសេតវិមាន​លោកស្រី សារ៉ាហ៍ សេនដឺស៍ (Sarah Sanders) បានបង្ហោះសារ​លើបណ្តាញ​សង្គម Twitter ថា «ទីតាំងសម្រាប់​កិច្ចប្រជុំកំពូលរវាង​លោក​​ប្រធានាធិបតីអាមេរិក និងមេដឹកនាំកូរ៉េខាងជើង លោក គីម ជុងអ៊ុន នឹងត្រូវធ្វើឡើង​នៅសណ្ឋាគារ Capella នៅកោះ សេនតូសា (Sentosa) ហើយយើង​សូមអរគុណចំពោះម្ចាស់ផ្ទះសិង្ហបុរី សម្រាប់ទទួលរៀបចំយ៉ាងកក់ក្តៅរបស់ពួកគេ»។

គួរជម្រាបថា បើតាមសេតវិមាន ជំនួបជាប្រវត្តិសាស្រ្តខាងលើនេះត្រូវបានកំណត់ថា នឹងប្រព្រឹត្តទៅនាវេលាម៉ោង ០៩៖០០នាទី​ព្រឹក​ថ្ងៃ​​ទី​១២ ខែមិថុនា គឺនាសប្តាហ៍​ក្រោយនេះ​នៅសិង្ហបុរី៕