(អង់ការ៉ា)៖ រដ្ឋមន្ត្រីការបរទេស​តួកគី លោក ម៉េវលុត កាវូសូគ្លូ (Mevlut Cavusoglu) បាននិយាយថា ទីក្រុងអង់ការ៉ាបាន​ត្រៀមខ្លួនរួចជាស្រេច​ ដើម្បី​ចាត់វិធានការ​តម្លើងពន្ធលើ​ការនាំចូលមុខ​ទំនិញ​អាមេរិក ជាការឆ្លើយ​នឹងការតម្លើងពន្ធ​លើការនាំចូល​ដែកថែប និង​អាលុយមីញ៉ូម ពីសំណាក់រដ្ឋបាល​ប្រធានាធិបតី​អាមេរិក លោក ដូណាល់ ត្រាំ ដែលកំពុង​បង្កភាពវឹកវរលើវិស័យពាណិជ្ជកម្មអន្តរជាតិ។ នេះបើតាម​ការចេញផ្សាយ​ដោយ​ ទីភ្នាក់ងារ​ព័ត៌មាន​ចិន ស៊ីនហួរ នៅព្រឹកថ្ងៃពុធ ទី០៦ ខែមិថុនា ឆ្នាំ២០១៨។

ជាមួយគ្នានោះ​ដែរ បើតាមសារព័ត៌មាន​តួកគី ហួរីយ៉េត ដេលី (Hurriyet Daily) តួកគី គ្រោងនឹង​តម្លើងពន្ធ​លើការនាំចូលផលិតផល​អាមេរិក នៅថ្ងៃ​ទី២១ ខែមិថុនានេះ។ សារព័ត៌មាន​មួយនេះ​បន្ថែមថា កាតព្វកិច្ចបង់ពន្ធ​បន្ថែម​សរុប ២៦៦.៥លានដុល្លារ នឹងត្រូវបាន​អនុវត្តន៍លើផលិត​ផលចំនួន ២២ ដែលនាំចូលពី​សហរដ្ឋអាមេរិក ក្នុងនោះ​រួមមាន​ធ្យូងថ្ម, ក្រដាស់, គ្រាប់ walnuts, គ្រាប់ almonds, ថ្នំាជក់, ស្រា whiskey, រថយន្ដ, គ្រឿងសម្អាង, គ្រឿងម៉ាស៊ីន, បរិក្ខា និងផលិតផល​ជីវៈឥន្ធនៈ​ជាដើម។

មិនតែប៉ុណ្ណោះ គំរោងតម្លើងពន្ធ​នេះនឹង ត្រូវអនុវត្តន៍​លើការនាំ​ចូលស្រា whiskey ៤០ភាគរយ និងរថយន្ដ ៣៥ភាគរយ ដើម្បីឆ្លើយតប​នឹងការតម្លើពន្ធនាំចូល​ដែកថែប ២៥​ភាគរយ និង​អាលុយមីញ៉ូម ១០ភាគរយ។

គួរបញ្ជាក់ថា តួកគីគឺជាប្រទេសផលិត​ដែកថែបធំជាងគេ​លំដាប់ទី ៨ នៅលើពិភពលោក និងជាអ្នកនាំចេញ​ដែកថែបធំជាង​គេ ជាប់​លេខរៀងទី ៦ ទៅកាន់​សហរដ្ឋអាមេរិក បន្ទាប់ពី​កាណាដា, ប្រេស៊ីល, កូរ៉េខាងត្បូង, មិចស៊ីកូ និងរុស្ស៊ី៕