(យូអិន)៖ អនាគត​​ប្រធានមហាសន្និបាត​ នៃអង្គការ​សហប្រជាជាតិ (UNGA) លោកស្រី ម៉ារៀ ហ្គាស៊ែស (Maria Garces) បានសន្យាថា នឹងខិតខំប្រឹងប្រែង​ធ្វើ​ឲ្យ​​​ការងារ​របស់ UN មានតម្លាភាព និងបើកទូលាយជាងមុន​ដល់អន្តរជាតិទាំងមូល នៅអំឡុងអាណត្តិ​ដឹកនាំរបស់​លោកស្រី។ នេះបើតាម​ការដកស្រង់​ការផ្សាយ​ចេញពី​ទីភ្នាក់ងារព័ត៌មាន​ចិន ស៊ីនហួរ នៅព្រឹក​ថ្ងៃពុធ ទី០៦ ខែមិថុនា ឆ្នាំ២០១៨។

ថ្លែងទៅក្រុមអ្នក​សារព័ត៌មាន​ នៅខាងក្រៅសាលសន្និបាត UNGA ក្រោយពីត្រូវ​បានបោះឆ្នោតជ្រើស​រើស ឲ្យ​កាន់មុខ​តំណែងនេះ​លោកស្រី Garces បាន​និយាយថា លោកស្រី​នឹងសម្រេចឲ្យបាន​នូវតម្លាភាព​ពេញលេញ ក្នុងអំឡុង​នៃអាណត្តិដឹកនាំ​របស់ខ្លួន ហើយ​លោកស្រី ក៏បាន​ប្តេជ្ញា​ថា​​រាល់សកម្មភាព​នៃស្ថាប័ននេះ នឹងត្រូវធ្វើឡើង​បើកចំហ និងជាសាធារណៈ សម្រាប់រាល់​ប្រជាជននានា​នៅជុំវិញ​ពិភពលោក ពីព្រោះវា​ដល់​ពេលហើយ ក្នុងការ​ធ្វើឲ្យ UN មានភាពស្និទ្ធស្នាល​នឹង​មនុស្សគ្រប់ៗ​គ្នា​ជាងមុន។

គួរជម្រាបថា លោកស្រី Maria Garces កើតនៅ​ថ្ងៃទី០៧ ខែកញ្ញា ឆ្នាំ១៩៦៤ និងជាអ្នក​នយោបាយ និងអ្នកការទូត​នៃប្រទេស​អេក្វាឌ័រ ត្រូវ​បាន​បោះឆ្នោត​​ជ្រើសរើស​ក្នុងសំឡេង​គាំទ្រ ១២៨ ទល់នឹង ៦២សំឡេង ដើម្បីឲ្យដឹកនាំ UNGA ដោយផ្តួលគូប្រកួត​ម្នាក់ទៀត គឺ​លោកស្រី ម៉ារី ហ្វ្លេក (Mary Flake) ដែលឯកអគ្គរដ្ឋទូតហុងឌូរ៉ាស់។ ម៉្យាងវិញទៀត​លោកស្រី Garces គឺជាស្រ្តីទី​០៤ហើយ ដែលទទួលបាន​​ឱកាសដឹកនាំស្ថាប័ន​អន្តរ​ជាតិ​ដែលមាន​សមាជិកចំនួន ១៩៣ប្រទេសនេះ។​

ចាប់តាំងពី​ឆ្នាំ១៩៤៥ UNAG បានបោះឆ្នោតជ្រើស​រើសស្រ្តីចំនួនតែ ០៣នាក់ប៉ុណ្ណោះ ធ្វើជាប្រធាន​ដឹកនាំ ក្នុងនោះរួមមាន​លោកស្រី វីចាយ៉ា ផាន់ឌិត (Vijaya Pandit) នៃប្រទេសឥណ្ឌា (ឆ្នាំ១៩៥៣), លោកស្រី អានជៃ ប្រ៊ូក (Angei Brook) នៃប្រទេសលីបេរីយ៉ា (ឆ្នាំ១៩៦៩), និងលោកស្រី ហ្សេខា អាល់ ខាលីហ្វា (Sheikha Al-Khalifa) នៃ​ប្រទេស​បារ៉ែន (ឆ្នាំ២០០៦) ពោលគឺ​មានតែបីរូបប៉ុណ្ណោះ ក្នុងចំណោម​ប្រធាន UNAG ទាំង ៧២នាក់៕