(អាមេរិក)៖ ក្រុមហ៊ុន Facebook បានប្រកាស​ឲ្យដឹងថា ខ្លួនបានសហការ​ក្នុងការចែករំលែក​ទិន្នន័យ​ ជាមួយក្រុមហ៊ុន​បច្ចេកវិទ្យា​ចិន​យ៉ាងតិច​ចំនួន ០៤ រួមមានទាងក្រុមហ៊ុន​ផលិតទូរស័ព្ទ​កំពុងមានភាពល្បី​រន្ទឺយ៉ាង​ខ្លាំងមួយ ដែល​មាន​ទំនាក់ទំនង​យ៉ាងជិតស្និទ្ធ​ ជាមួយរដ្ឋាភិបាល​ចិន​​ផងដែរ។ នេះបើតាមការ​ដកស្រង់ការ​ផ្សាយចេញ​ពីសារព័ត៌មាន CNBC នៅព្រឹក​ថ្ងៃពុធ ទី០៦ ខែមិថុនា ឆ្នាំ២០១៨។

កិច្ចព្រមព្រៀង​ខាងលើ ដែលបានកើត​មានឡើងតាំងតែពីឆ្នាំ២០១០ មកម្ល៉េះនោះ បានផ្តល់សិទ្ធិ​ឯកជន ទាក់ទិន​នឹងការប្រើប្រាស់​ទិន្នន័យ​អ្នក​ប្រើ​ប្រាស់​​មួយ​ចំនួន ដល់ក្រុមហ៊ុន​ទូរគមនាគមន៍​ និងបច្ចេកវិទ្យាយក្ស​របស់ប្រទេស​ចិន Huawei ដែលត្រូវក្រុម​មន្រ្តី​ស៊ើបការណ៍​សម្ងាត់​អាមេរិក​ដាក់​មុខ​សញ្ញា​ថា ​ជា​ការគំរាម​កំហែង​ផ្នែក​សន្តិសុខ រួមជាមួយ​ក្រុមហ៊ុន Lenovo, Oppo, និង TCL។ ក្រៅពីក្រុមហ៊ុនចិន ក្រុមហ៊ុន​​អាមេរិក Amazon, Apple, BlackBerry, និង Samsung ក៏ទទួល​បានសិទ្ធិឯកជននេះ​ផងដែរ។

ជុំវិញរឿង​នេះ Facebook បានបញ្ជាក់ថា ទិន្នន័យដែលចែករំលែកជាមួយ Huawei គឺត្រូវរក្សាទុកនៅលើទូរស័ព្ទ ពុំមែននៅលើម៉ាស៊ីន Server របស់ក្រុមហ៊ុននេះទេ។

គួរជម្រាបថា ក្រុមហ៊ុន Huawei ទទួលបានឥណទាន​រាប់ពាន់លានដុល្លារ ពីធនាគាររបស់​រដ្ឋាភិបាលចិន ដើម្បីជួយ​ក្រុមហ៊ុន​នេះ​ក្នុងពង្រីក​វិសាលភាព​នៅក្រៅប្រទេស​របស់ខ្លួន រួមមាននៅអាហ្វិ្រក អឺរ៉ុប និង​អាមេរិកឡាទីន​​ជាដើម ហើយស្ថាបនិក​របស់ Huawei គឺ​លោក រិន ចេងហ្វៃ (Ren Zhengfei) ក៏ជាអតីតវិស្វករនៅក្នុងជួរកងទ័ពចិនផងដែរ។

ក្រុមអ្នកតាក់តែង​ច្បាប់នៅ​សហរដ្ឋអាមេរិក ក្តីព្រួយបារម្ភ​ចំពោះក្រុមហ៊ុនចិន​មួយនេះ​ អស់រយៈពេល​ជាច្រើនឆ្នាំណាស់​មកហើយ និងថែម​ទាំង​បានណែនាំឲ្យ​​ក្រុមហ៊ុនបម្រើ​សេវាទូរស័ព្ទ​ចល័ត​អាមេរិក ជៀសវាង​ទិញបរិក្ខា Network ពី Huawei ទៀតផង ហើយកាល​ពីខែមករា​​កន្លងទៅ សារ​ព័ត៌មាន Times បានរាយការណ៍ថា ក្រុមហ៊ុន AT&T បានសម្រេច​មិនទិញចូលនូវ​ស្មាតហ្វូន​ស៊េរីថ្មីបំផុត នាពេលនោះ​របស់​ Huawei គឺ Mate 10 តែម្តង៕