(អ៊ីស្រាអែល)៖​ ខណៈស្ថានការណ៍​កំពុងតែក្តៅគគុកឡើង​វិញនោះ នាយករដ្ឋមន្ត្រី​អ៊ីស្រាអែលបាន​អះអាងថា សេចក្តីប្រកាស​របស់មេដឹកនាំ​កំពូលអ៊ីរ៉ង់ លោក អាលី ខាមេណៃ បានបញ្ជាក់​យ៉ាងច្បាស់ថា អ៊ីរ៉ង់កំពុងប្តេជ្ញា​បង្កើនការចម្រាញ់​សារធាតុ​អ៊ុយរ៉ាញ៉ូម ដើម្បីផលិត​អាវុធ​នុយក្លេអ៊ែរ។ នេះបើតាមការ​ដកស្រង់​ការផ្សាយពី​ Sputnik នាយប់​ថ្ងៃអង្គារ ទី០៥ ខែមិថុនា ឆ្នាំ២០១៨។

នាយករដ្ឋមន្ត្រី​អ៊ីស្រាអែល លោក ប៊ិនចាមីន ណឺតាន់យ៉ាហ៊ូ បានបញ្ជាក់​យ៉ាងដូច្នេះថា «កាលពីពីរ​ថ្ងៃមុន មេដឹកនាំអ៊ីរ៉ង់ អាយ៉ាតូឡាហ៍ អាលី ខាមេណៃ បាន​លើកឡើង​ពីចេតនា​របស់លោកថា ចង់បំផ្លាញ​អ៊ីស្រាអែល។ កាលពីម្សិល​មិញលោកបាន​ពន្យល់​ទៀតថា លោកពិតជាចង់ធ្វើវា ជាមួយនឹងចម្រាញ់​សារធាតុអ៊ុយរ៉ាញ៉ូម​ឲ្យបាន​លើស​លប់ ដើម្បីផលិត​ចេញជាអាវុធ​នុយក្លេអ៊ែរ...»។

ទោះបីជាបែប​នេះក៏ដោយ មេដឹកនាំអ៊ីស្រាអែល​ខាងលើនេះ​បានប្តេជ្ញាថា នឹងមិនបណ្តោយ​ឲ្យអ៊ីរ៉ង់ សម្រេចបាន​អាវុធនុយក្លេអ៊ែរ​ជាដាច់ខាត។ ស្ថានការណ៍​ជាមួយអ៊ីរ៉ង់​ចាប់ផ្តើមក្តៅ​ខ្លាំង ដោយសារតែ​អាមេរិកដកខ្លួនចេញពី​កិច្ចព្រមព្រៀង​នុយក្លេអ៊ែរ​ឆ្នាំ២០១៥ និងការចោទដោយអ៊ីស្រាអែលទៅលើ​អ៊ីរ៉ង់ថា កំពុងបង្កើត​មូលដ្ឋានទ័ព​ក្នុងទឹកដី​ស៊ីរី ដើម្បីគ្រោង​វាយប្រហារខ្លួន៕