(ម៉ូស្គូ)៖ គេហទំព័រ Down Detector ជំនាញខាង​តាមដានដំណើរការ​ របស់បណ្ដាញ​ទំនាក់ទំនង​សង្គមល្បីៗ​​នៅលើ​ពិភពលោក​បានឱ្យ​ដឹងថា អ្នកប្រើប្រាស់ Instagram បានរាយការណ៍​ពីបញ្ហា​ជាច្រើន នៅពេលពួកគេ​ព្យាយាមចូលគណនី​របស់ខ្លួនដើម្បី Update Feedback និងចូលទៅក្នុង​គេហទំព័រ Instagram។ នេះបើតាម​ការចេញផ្សាយ​ដោយ​សារព័ត៌មាន Sputnik​ នៅរសៀលថ្ងៃអង្គារ ទី០៥ ខែមិថុនា ឆ្នាំ២០១៨។

យោងតាម Down Detector បញ្ហាដែលកើត​មាន​នៅលើ Instagram ត្រូវបានរាយការណ៍​ដោយអ្នកប្រើប្រាស់​ នៅក្នុងសហរដ្ឋអាមេរិក អឺរ៉ុប និងផ្នែកខ្លះនៃប្រទេស​រុស្ស៊ី បូករួមទាំងប្រទេស​ជប៉ុនផងដែរ។ ប៉ុន្តែ គេមិនទាន់​អាចកំណត់​ពីបញ្ហាពិតប្រាកដ​នៅឡើយទេ​ថា វាត្រូវបានគេ Hack ឬក៏យ៉ាងណា។

បន្ថែមពី​​លើនេះ Down Detector ក៏បាន​បញ្ជាក់ដែរថា អ្នកប្រើប្រាស់ Instagram ៤៩ភាគរយ មិនអាចចូល​​ក្នុងគណនី​​របស់ខ្លួនបាន, ៤០ភាគរយ​​មានបញ្ហា Refresh ព័ត៌មាននៅក្នុង​​គណនីមិន​ប្រក្រតី, ខណៈ១០ភាគរយ​ទៀត​ មិនអាចចូល​ក្នុងគេហទំព័រ នៃបណ្ដាញ​ទំនាក់ទំនង​សង្គមមួយ​នេះ​បានតែម្តង។

គួរបញ្ជាក់ថា បណ្តាញសង្គម​​ដែលស្ថិតនៅក្រោម​ការគ្រប់គ្រង​របស់ Facebook ខាងលើនេះ មិនទាន់មាន​សេចក្តីថ្លែងការណ៍​ណាមួយ ឆ្លើយតប​ចំពោះ​​ការចេញ​ព័ត៌មានអំពី​បញ្ហានានាដូច​បានរៀបរាប់​នោះ​ឡើយ៕