(វែសប៊ែង)៖ បុរសប៉ាឡេស្ទីន​ម្នាក់បាន​ស្លាប់ ដោយ​ការគ្រាប់កាំភ្លើងបាញ់ដោយទាហាន​អ៊ីស្រាអែល​​នាថ្ងៃសៅរ៍នេះ នៅទីក្រុង​ហេប្រុន (Hebron) ភាគខាងលិច​នៃដែនដី វែសប៊ែង (West Bank) ។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន ស៊ីនហួរ (Xinhua) នៅវេលា​យប់​ថ្ងៃសៅរិ៍ ទី០២ ខែមិថុនា ឆ្នាំ២០១៨ ដែលបានដកស្រង់​ចេញពី​របាយការណ៍ របស់ក្រសួងសុខាភិបាល​ប៉ាឡេស្ទីន។

ក្រសួងសុខាភិបាល​ប៉ាឡេស្ទីន​ មិនបានបង្ហាញ​ព័ត៌មានលម្អិត​អំពីការស្លាប់នៃ​បុរស នៅក្នុងសេចក្តីថ្លែងការណ៍​របស់ខ្លួននោះទេ។ ប៉ុន្តែយោងតាម​ប្រភពសន្តិសុខ​ប៉ាឡេស្ទីន បានប្រាប់ភ្នាក់ងារ​សារព័ត៌មាន​ស៊ីនហួរថា បុរសដែលគេ​បាញ់សម្លាប់នោះ ត្រូវបានកំណត់​អត្តសញ្ញាណ​ថា មានអាយុ ៣០ ឆ្នាំ ឈ្មោះ រ៉ាមី សាប៊ែណេ (Rami Sabarneh) ហើយជាអ្នកធ្វើការក្បែររបាំងការពាររបស់កងទ័ពអ៊ីស្រាអែល។

គួរបញ្ជាក់ យោងតាមប្រភព​ពីផ្នែកសន្តិសុខប៉ាឡេស្ទីន​ដដែលនេះ​បានរាយការណ៍ថា កងកម្លាំងទាហានអ៊ីស្រាអែល បានរារាំងមិនឲ្យរថយន្ត​សង្គ្រោះបន្ទាន់របស់​ប៉ាឡេស្ទីនទៅដល់​កន្លែងកើតហេតុក្រោយ​ពីឧបទ្ទវហេតុ​បាញ់សម្លាប់​មនុស្សនេះ បានកើតឡើង​ឡើយ៕