(សាណាអា)៖ ក្រុមឧទ្ទាមហួធី (Houthi) នៅប្រទេសយ៉េមែនបានប្រកាសថា កងកម្លាំងរបស់ខ្លួនបានបាញ់ទម្លាក់ ឧទ្ធម្ភាគចក្រមួយគ្រឿងរបស់កងទ័ពអាកាសនៃប្រទេសអារ៉ាប៊ីសាអូឌីត នៅក្នុងប្រយុទ្ធគ្នាទាំងយប់ នាតំបន់ឆ្នេរភាគខាងលិចប្រទេសយ៉េមែន។ នេះបើតាមការចេញផ្សាយដោយ ស៊ីនហួរ នារសៀលថ្ងៃសៅរ៍ ទី០២ ខែមិថុនា ឆ្នាំ២០១៨។
មេដឹកនាំគណកម្មាធិការបដិវត្តន៍ជាន់ខ្ពស់ គាំទ្រក្រុមឧទ្ទាម ហួធី (HSRC) លោក ម៉ូហាំម៉េដ អាលី អាល់ហួធី (Mohammed Ali al-Houthi) បានបញ្ជាក់នៅក្នុង Twitter ផ្លូវការរបស់លោកថា កងកម្លាំងរបស់ក្រុម HSRC បានបាញ់ទម្លាក់ឧទ្ធម្ភាគចក្រខាងលើនេះ នៅអំឡុងពេលធ្វើសង្គ្រាមទាំងយប់ ប្រឆាំងនឹងកងកម្លាំងចំរុះគាំទ្រដោយរដ្ឋាភិបាលយ៉េមែន នៅតំបន់ឆ្នេរ ដែលស្ថិតនៅមិនឆ្ងាយប៉ុន្មាននោះឡើយ ពីភាគខាងត្បូងកំពង់ផែសមុទ្រ Red Sea នៃទីក្រុង ហូដៃដាហ៍ (Hodeidah)។
គួរបញ្ជាក់ថា ភាគីខាងអារ៉ាប៊ីសាអូឌីត មិនទាន់បានចេញមុខអះអាង អំពីការថ្លែងពីក្រុមហួធីនោះឡើយ។ កាលពីថ្ងៃសុក្រម្សិលមិញនេះ ការប៉ះទង្គិចគ្នារវាងភាគីក្រុមឧទ្ទាម និងកងកម្លាំងចុះដឹកនាំដោយអារ៉ាប៊ីសាអូឌីត ដើម្បីគាំទ្ររដ្ឋាភិបាលយ៉េមែននោះ បានបណ្តាលឲ្យមនុស្សស្លាប់សរុប ៧៨នាក់ (មកពីភាគីទាំងសងខាង)៕
