(រីយ៉ូ)៖ ​នាយក​ប្រតិបត្តិ (CEO) នៃក្រុមហ៊ុន​ប្រេង និងឧស្ម័ន​ដ៏ធំ ដែល​គ្រប់គ្រង​​ដោយរដ្ឋាភិបាល​ប្រេស៊ីល ផេត្រូប្រាស (Petrobras) លោក ផាត្រូដ ភែរិនតេ (Padro Parente) បានប្រកាស​ពីការលាលែងពីតំណែង​ នាថ្ងៃសុក្រ​សប្តាហ៍នេះ (ពេលវេលា​នៅ​ប្រេស៊ីល)។ នេះបើតាម​ការដកស្រង់​ការផ្សាយចេញ​ពី ទីភ្នាក់​ងារ​ព័ត៌មាន​ចិន ស៊ីនហួរ នៅរសៀល​ថ្ងៃសៅរ៍ ទី០២ ខែមិថុនា ឆ្នាំ២០១៨។

ការចុះចេញ​ពីតួនាទី​របស់លោក Parente ត្រូវបានធ្វើឡើង ​បន្ទាប់ពីបណ្តាបុគ្គលិក​របស់​ក្រុមហ៊ុន Petrobras ដែលបាន​ចាប់ផ្តើមកាលពី​​ថ្ងៃ​​ពុធកន្លង​ទៅនេះ ក្រោមគោលដៅ​ចម្បង គឺចង់ឲ្យមានការដកហូតតំណែង​លោក Parente។ ខណៈដែល​លោក Padro Parente បាន​សម្រេច​​ដើរចេញពី​តួនាទី នាយកផ្នែក​ហិរញ្ញវត្ថុ (CFO)​ របស់​ក្រុមហ៊ុន លោក អ៊ីវ៉ាន ម៉ុនទៃរ៉ូ (Ivan Monteiro) នឹងឡើងដឹកនាំ​ក្រុមហ៊ុនជា​បណ្តោះ​អាសន្នសិន រហូត​​ទាល់តែ CEO ថ្មីត្រូវបាន​តែង​តាំង។

គួរជម្រាប​ថា លោក Parente បានដឹកនាំ​ក្រុមហ៊ុនប្រេងយក្ស​នេះអស់រយៈពេល ០២ឆ្នាំ មកហើយ ដោយនៅអំឡុង​ការរដ្ឋបាលគ្រប់គ្រង​​របស់​លោក រដ្ឋាភិបាល​ប្រេស៊ីល បានអនុញ្ញាត​ឲ្យមានការកែប្រែ​ លើដំណើរការនៃការកំណត់​តម្លៃប្រេង ដែលបានបណ្តាល​ឲ្យមានការបង្កើន​ ថ្លៃ​ប្រេង​​ជា​​ញឹក​ញាប់​​។ តួយ៉ាងតម្លៃ​ប្រេងម៉ាស៊ូត បានកើន​ឡើងជាង ៥០ភាគរយ កាលពី​ឆ្នាំទៅតែឯង​ប៉ុណ្ណោះ។

ជាងនេះទៅទៀត ក្រុមអ្នកបើកឡាន​ដឹកឥវ៉ាន់ធំៗ​នៅទូទាំងប្រទេស ក៏បានធ្វើកូដកម្ម​បិទផ្លូវរយៈពេល ១០ថ្ងៃ កាលពី​ខែមុន​ផងដែរ ជុំវិញ​បញ្ហាតម្លៃ​ប្រេងឡើង​ថ្លៃ រហូតដល់​រដ្ឋាភិបាលបាន​យល់ព្រមបញ្ចុះ​ថ្លៃ​ម៉ាស៊ូត​ ក្នុងកម្រិតច្រើន​គួសម៕