(សេអ៊ូល)៖ មន្ត្រីកំពូលៗនៃប្រទេសកូរ៉េខាងត្បូង និងប្រទេសកូរ៉េខាងជើង បានជួបជុំគ្នាជាថ្មីទៀតហើយ នៅឯភូមិផាន់ម៉ុនចុម (Panmunjom) ទឹកដីព្រំដែនខាងកូរ៉េខាងត្បូង នៅវេលាម៉ោង ១០៖០០នាទីព្រឹកថ្ងៃសុក្រនេះ ដោយផ្តោតសំខាន់លើវិស័យសំខាន់ៗមួយចំនួន ជាពិសេសការអនុវត្តន៍នូវកិច្ចព្រមព្រៀងរួម ដែលបានសម្រេចនាពេលកន្លងមក។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃសុក្រ ទី០១ ខែមិថុនា ឆ្នាំ២០១៨។
កិច្ចពិភាក្សាកម្រិតខ្ពស់ជាថ្មីនេះ កំពុងប្រព្រឹត្តទៅដោយមានការចូលរួមពីរដ្ឋមន្ត្រីក្រសួងបង្រួបបង្រួមជាតិរបស់កូរ៉េខាងត្បូង លោក ចូ ម្យុងក្យុន (Cho Myoung-gyon) ជាមួយនឹងសមាជិកអមចំនួន ០៥រូប ខណៈកូរ៉េខាងជើងវិញត្រូវបានដឹកនាំដោយ លោក រី សុនក្វុន (Ri Son Gwon) ប្រធានគណៈកម្មាធិការសម្រាប់ការរួបរួមដោយសន្តិភាព នៃដែនដីកូរ៉េខាងជើង។
ព័ត៌មានបានបន្តថា មន្ត្រីកំពូលៗនៃប្រទេសទាំងពីរ ជួបគ្នាពេលនេះដើម្បីពិភាក្សាអំពីបញ្ហាទំនាក់ទំនងរួមដូចជា គំរោងផ្លូវដែក, កីឡា និងកិច្ចសហប្រតិបត្តិការអន្តរកូរ៉េ។ បន្ថែមពីនេះ មន្ត្រីតំណាងប្រទេសទាំងពីរក៏បានបញ្ជាក់នៅខាងដើមកិច្ចប្រជុំផងដែរថា ប្រទេសទាំងពីរ នឹងពិភាក្សាអំពីការអនុវត្តន៍តាមឲ្យបាននូវកិច្ចព្រមព្រៀង ដែលមេដឹកនាំកំពូលគឺលោក គីម ជុងអ៊ុន និងលោក មូន ជែអ៊ីន បានសម្រេចកាលពីមុន ដើម្បីធ្វើឲ្យទំនាក់ទំនងរវាងប្រទេសទាំងពីរមានស្ថានភាពកាន់តែប្រសើរឡើង៕
