(គូឡាឡាំពួ)៖ នាយករដ្ឋមន្រ្តីម៉ាឡេស៊ី លោក មហាធា ម៉ូហាម៉េដ (Mahathir Mohamad) បាននិយាយថា វាដល់ពេលដល់​វេលាហើយ ដែលប្រទេស​ម៉ាឡេស៊ី​ត្រូវ​បញ្ឈប់ប្រតិបត្តិការ​ស្វែងរក​យន្តហោះ​ម៉ាឡេស៊ី​ ជើងហោះហើរ MH370 ក្រោយពី​ការ​រុករក​ថ្មី​ចំណាយពេល ០៣ខែកន្លង​កន្លង​ទៅនេះ ដោយក្រុមហ៊ុនអាមេរិក បានបញ្ចប់​ទៅកាលពីថ្ងៃអង្គារ​ម្សិលមិញ ដោយពុំមាន​លទ្ធផល​អ្វីសោះ។ នេះបើតាម​ការដកស្រង់​ការផ្សាយ​​ចេញ​ពី ទីភ្នាក់ងារ​ព័ត៌មានចិន ស៊ីនហួរ នៅរសៀល​ថ្ងៃពុធ ទី៣០ ខែឧសភា ឆ្នាំ២០១៨។

ថ្លែងក្នុងសន្និសីទ​សារព័ត៌មាន​មួយ នៅក្រោយកិច្ច​ប្រជុំគណៈរដ្ឋមន្រ្តីប្រចាំសប្តាហ៍ លោក Mahathir បានលើក​ឡើងយ៉ាងដូច្នេះថា «មកទល់​​ពេល​​នេះ យើងពុំបានរក​ឃើញវត្ថុតាងជាក់​លាក់អ្វីនៅឡើយ ដូច្នេះហើយ​យើងបានឈាន​ដល់ដំណាក់​កាល ដែលពួកយើងមិន​អាចបន្តតាម​ស្វែង​​រកអ្វី ដែលយើង​ពិតជាមិនអាចមាន​លទ្ធភាពនឹងរកឃើញ​នោះទេ»

ជាចុងក្រោយ​លោកនាយករដ្ឋមន្រ្តីម៉ាឡេស៊ី បានបន្ថែមថា រដ្ឋាភិបាលថ្មី​របស់លោក នឹងធ្វើការពិចារណាបន្តប្រតិបត្តិការរុករក​ឡើងវិញ បើ​សិនជា​មានការព័ត៌មាន​ថ្មីផ្សេងៗពាក់ព័ន្ធ​នឹង​យន្តហោះ MH370 ប៉ុន្តែនៅ​ពេលនេះ វាត្រូវបាន​បញ្ចប់។ គួរជម្រាបថា នាម្សិលមិញនេះ អាជ្ញាធរម៉ាឡេស៊ី ក៏បានអះអាង​ផងដែរថា នឹងបញ្ចេញរបាយការណ៍​ទាំងអស់​អំពី MH370 ជាសាធារណៈ​តែម្តង៕