(ម៉ូស្គូ)៖ ប្រព័ន្ធអេឡិចត្រូនិកសម្រាប់ប្រើប្រាស់ ក្នុងសមរភូមិថ្មីរបស់រុស្ស៊ី នឹងត្រូវអភិវឌ្ឍន៍ឡើងនៅក្នុងរយៈពេល ០៣ឆ្នាំ ដោយឈរលើមូលដ្ឋាននៃទិន្នន័យទទួលបានពីការសិក្សាទៅលើគ្រាប់មីស៊ីលប្រដេញ តូម៉ាហក (Tomahawk) របស់សហរដ្ឋអាមេរិក ដែលត្រូវបាននាំយកមកកាន់រុស្ស៊ីពីប្រទេសស៊ីរី។ នេះបើតាមសម្តីរបស់ លោក វ្ល៉ាឌីមៀ ម៉ាឃីវ (Vladimir Mikheev) អគ្គនាយករងក្រុមហ៊ុនអភិវឌ្ឍន៍បច្ចេកវិទ្យាយោធារបស់រដ្ឋាភិបាលរុស្ស៊ីហៅកាត់ថា ក្រេត (KRET) ដកស្រង់ដោយសារព័ត៌មានរុស្ស៊ី Sputnik នៅរសៀលថ្ងៃអង្គារ ទី២៩ ខែឧសភា ឆ្នាំ២០១៨។
យោធាស៊ីរីបានរកឃើញគ្រាប់មីស៊ីល Tomahawk មិនទាន់ផ្ទុះចំនួន ០២គ្រាប់ នៅក្រោយការវាយប្រហារ ដោយការបាញ់ស្រោចមីស៊ីលទៅលើប្រទេសស៊ីរី ពីសំណាក់សហរដ្ឋអាមេរិក ចក្រភពអង់គ្លេស និងបារាំងកាលពីថ្ងៃទី១៤ ខែមេសាកន្លងទៅ ហើយរដ្ឋាភិបាលទីក្រុងដាម៉ាស់ បានសម្រេចប្រគល់ពួកវាមកឲ្យប្រទេសរុស្ស៊ី។
គួរជម្រាបថា តាមរយៈការសិក្សាស្វែងយល់ពីព័ត៌មានសំខាន់ៗ ទៅលើមីស៊ីល Tomahawk វានឹងជួយប្រទេសរុស្ស៊ី បានយ៉ាងច្រើនក្នុងការអភិវឌ្ឍបច្ចេកវិទ្យា ដើម្បីទប់ទល់ប្រកបដោយប្រសិទ្ធភាពជាងមុន ជាមួយមីស៊ីលប្រដេញដ៏មានអានុភាពនេះ៕
