(ម៉ូស្គូ)៖ មេបញ្ជាការកងកម្លាំងយុទ្ធសាស្ត្រមីស៊ីលរុស្ស៊ី លោក ស៊ឺហ្គៃ ការ៉ាកាយ៉េវ (Sergei Karakayev) បានកត់សម្គាល់ថា ការកើនឡើងនៃទំនើបកម្មអាវុធនៅក្នុងអង្គភាពមួយនេះ បានផ្ដល់នូវសមត្ថភាពថ្មីមួយ ក្នុងការបង្ការការវាយប្រហារដោយអាវុធនុយក្លេអ៊ែរ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃចន្ទ ទី២៨ ខែឧសភា ឆ្នាំ២០១៨។
ថ្លែងនៅក្នុងបទសម្ភាសន៍ ចេញផ្សាយដោយសារព័ត៌មាននៅក្នុងស្រុកនៅថ្ងៃចន្ទនេះ លោក Karakayev ក៏បានបញ្ជាក់ដែរថា ការអនុវត្តន៍ផែនការឆ្នាំ២០១៧ ស្ដីពីការបំពាក់អាវុធឡើងវិញឱ្យកងកម្លាំងយុទ្ធសាស្ត្រមីស៊ីលរុស្ស៊ី បានចូលរួមចំណែកធ្វើឱ្យការធ្វើទំនើបកម្មអាវុធកើនឡើងរហូតដល់ ៦០ភាគរយ ជាមួយការផ្ដល់នូវសមត្ថភាពថ្មី ក្នុងការបង្ការការវាយប្រហារ ដោយអាវុធនុយក្លេអ៊ែរទៀតផង។
កងកម្លាំងយុទ្ធសាស្ត្រមីស៊ីលរុស្ស៊ី បានទទួលការបំពាក់អាវុធដ៏ច្រើនលើសលប់ ដើម្បីដំណើរការប្រតិបត្តិការរបស់ពួកគេ ព្រមទាំងធានាការពារ និងប្រើប្រាស់ក្នុងការប្រយុទ្ធ។ គួរបញ្ជាក់ថា នារយៈពេលប៉ុន្មានឆ្នាំចុងក្រោយនេះ រុស្ស៊ីបានបង្កើនការធ្វើទំនើបកម្មអាវុធ និងយោធារបស់ខ្លួនយ៉ាងខ្លាំង។ ជាក់ស្ដែងបើតាមកម្មវិធីអាវុធរុស្ស៊ី ឆ្នាំ២០១៨-២០១៩ យោធារុស្ស៊ីមានគំរោងធ្វើបច្ចុប្បន្នភាពអាវុធ រួមទាំងកម្លាំងយោធា ដោយចំណាយប្រាក់ជាង ៣៥២.៣ពាន់លានដុល្លារ៕
