(សេអ៊ូល)៖ ប្រធានាធិបតីកូរ៉េខាងត្បូង លោក មូន ជែអ៊ីន បានបើកកិច្ចប្រជុំជាលើកទីពីរ ជាមួយប្រមុខដឹកនាំកូរ៉េខាងជើង លោក គីម ជុងអ៊ុន នាថ្ងៃសៅរ៍នេះ ដែលជំនួបគួរឲ្យភ្ញាក់ផ្អើលនេះ ទំនងជាត្រូវបានធ្វើឡើងក្រោមគោលបំណងបញ្ចុះបញ្ចូលឲ្យលោក គីម យល់ព្រមបន្តបើកកិច្ចប្រជុំកំពូលជាមួយប្រធានាធិបតីអាមេរិក លោក ដូណាល់ ត្រាំ។ នេះបើតាមការដកស្រង់ការផ្សាយចេញពីទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅយប់ថ្ងៃសៅរ៍ ទី២៦ ខែឧសភា ឆ្នាំ២០១៨។
បើតាមអ្នកនាំពាក្យរបស់លោក មូន លោកប្រធានាធិបតីកូរ៉េខាងត្បូង បានបើកកិច្ចប្រជុំជាលើកទីពីរ ជាមួយលោក គីម ជុងអ៊ុន នៅឯអគារ Tongil-gak ដែលស្ថិតលើទឹកដីកូរ៉េខាងជើង ក្នុងភូមិ Panmunjom ដែលជាតំបន់ព្រំដែនអន្តរកូរ៉េ កាលពីវេលាម៉ោង០៣៖០០នាទីរសៀលដល់ម៉ោង០៥៖០០នាទីល្ងាចថ្ងៃសៅរ៍នេះ (ពេលវេលានៅឧបទ្វីបកូរ៉េ)។
គួរជម្រាបថា ជំនួបជាលើកទីពីររវាងលោក មូន និងលោក គីម នេះ បានកើតមានឡើងនៅមួយខែក្រោយ ពីមេដឹកនាំកូរ៉េទាំងពីរ បានបើកកិច្ចប្រជុំកំពូលជាលើកដំបូង នៅឯភូមិ Panmunjom កាលពីថ្ងៃទី២៧ ខែមេសាកន្លងទៅ ហើយវាបានកើតឡើងនៅពីរថ្ងៃក្រោយ លោក ដូណាល់ ត្រាំ បានសរសេរលិខិតផ្ញើទៅលោក គីម ជុងអ៊ុន ដើម្បីជូនដំណឹងពីការលុបចោលជំនួបកំពូលអាមេរិក-កូរ៉េខាងជើង ដែលត្រូវបានគ្រោងថានឹងប្រព្រឹត្តទៅនាថ្ងៃទី១២ ខែមិថុនា នៅប្រទេសិង្ហបុរី។ ដោយឡែកនៅព្រឹកថ្ងៃសៅរ៍នេះវិញ លោក ត្រាំ បែរជាបាននិយាយថាកិច្ចប្រជុំរវាងលោកនិងលោក គីម ជុងអ៊ុន អាចនឹងកើតមានឡើងដូចការគ្រោងទុកដដែល។
ដោយឡែក បើតាមវិមានប្រធានាធិបតីកូរ៉េខាងត្បូង នៅក្នុងជំនួបលើកទីពីរនាថ្ងៃនេះ លោក មូន និងលោក គីម បានផ្លាស់ប្តូរទស្សនៈដោយត្រង់ៗទៅវិញទៅមក ជុំវិញការអនុវត្តន៍សេចក្តីប្រកាសរួម ដែលបានធ្វើឡើងនៅភូមិ Panmunjom កាលពីថ្ងៃទី២៧ ខែមេសា និងជុំវិញកិច្ចប្រជុំកំពូលកូរ៉េខាងជើង-អាមេរិក ហើយលោក មូន ផ្ទាល់ នឹងបើកសន្និសីទសារព័ត៌មានមួយនាព្រឹកថ្ងៃស្អែក ដើម្បីបកស្រាយពីលទ្ធផលនៃជំនួបលើកទីពីររបស់លោក ជាមួយលោក គីម ជុងអ៊ុន៕
