(ម៉ាឡេស៊ី)៖ ឆ្លើយតបតាមការអញ្ជើញរបស់នាយករដ្ឋមន្រ្តីថ្មី​ទី៧ របស់ម៉ាឡេស៊ី សម្តេច Tun Dr Mahathir MOHAMAD និងជាអតីតនាយករដ្ឋមន្រ្តី រយៈពេល២២ឆ្នាំ ​ពីឆ្នាំ​១៩៨១-​២០០៣, លោកឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្រ្តី បានអញ្ជើញចូលរួមទទួលទានស្រាយបួសរ៉ាម៉ាឌន នៅរាត្រីថ្ងៃទី​២៥ ខែឧសភា ឆ្នាំ២០១៨​នៅទីក្រុងរាជរដ្ឋាភិបាល Putrajaya ដែលមានការចូលរួមពីថ្នាក់ដឹកនាំ មន្រ្តីជាន់ខ្ពស់ នៃរដ្ឋាភិបាលម៉ាឡេស៊ី និងតំណាងស្ថាប័នអង្គការក្នុងប្រទេសម៉ាឡេស៊ីជាច្រើន​។

លោកឧកញ៉ា អូស្មាន ហាស្សាន់ បាន​នាំក្តីនឹករលឹក និង​ការផ្តាំផ្ញើសាកសួរសុខទុក្ខ​ពីសម្តេច​តេជោ ហ៊ុន សែន នាយករដ្ឋមន្ដ្រីនៃកម្ពុជា ដល់នាយករដ្ឋមន្រ្តីម៉ាឡេស៊ី ព្រមទាំងការអបអរសាទរ ចំពោះជ័យជំនះសារជាថ្មី ក្នុងការក្លាយជានាយករដ្ឋមន្រ្តី បន្ទាប់ពីបានលាលែងពីតំណែងជានាយករដ្ឋមន្រ្តី អស់រយៈកាល១៥ឆ្នាំកន្លងទៅ។

បន្ទាប់ពីបានថ្លែងការអបអរសាទរចំពោះវត្តមានរបស់ សមាជិករាជរដ្ឋាភិបាលកម្ពុជា សម្តេចនាយករដ្ឋមន្រ្តីម៉ាឡេស៊ី ក៏បានផ្តាំផ្ញើក្តីនឹករលឹក និង​ការសាកសួរសុខទុក្ខ​ទៅកាន់សម្តេចតេជោ ហ៊ុន សែន នាយករដ្ឋមន្រ្តីនៃ​កម្ពុជាផងដែរ។

គួរបញ្ជាក់​ថា ក្រៅពីធ្លាប់បានចូលរួមជ្រោមជ្រែង និងការផ្តល់ជំនួយលើវិស័យផ្សេងៗ ដល់សហគមន៍ខ្មែរឥស្លាម​នៅឆ្នាំ២០០៨ គឺ​៥ឆ្នាំក្រោយពីការលាលែងពីតំណែង ជានាយករដ្ឋមន្រ្តី សម្តេច Tun Dr Mahathir MOHAMAD ក៏ធ្លាប់អញ្ជើញធ្វើបឋកថា ជាមួយថ្នាក់ដឹកនាំខ្មែរឥស្លាម គណៈអ៊ីម៉ាំរាជធានី ខេត្ត ក្រុង ស្រុក និង​គ្រូខ្មែរឥស្លាម ដែលចូលរួមជាង៥០០នាក់ផងដែរ៕