(ម៉ូស្គូ)៖ ក្រសួងការពារជាតិរុស្ស៊ីនៅថ្ងៃសុក្រនេះ បានចេញសេចក្តីថ្លែងការណ៍ច្រានចោល ការចោទប្រកាន់របស់ក្រុមជំនាញហូឡង់ថា យោធារុស្ស៊ីជាអ្នកចុចមីស៊ីល​ចេញពីមូលដ្ឋាន​យោធា​ក្នុងទឹកដីរបស់ខ្លួនក្នុងទីក្រុង Kursk ដើម្បីបាញ់​ ទម្លាក់​យន្តហោះ MH17 របស់ម៉ាឡេស៊ី កាលពីថ្ងៃទី១៧ ខែកក្កដា ឆ្នាំ២០១៤ និងបានសម្លាប់​មនុស្ស​ទាំងអស់ជិត ៣០០នាក់។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាល្ងាចថ្ងៃសុក្រ ទី២៥ ខែឧសភា ឆ្នាំ២០១៨។

នៅក្នុងសេចក្តីថ្លែងការណ៍ខាងលើនេះបានបញ្ជាក់ថា «គ្មានមីស៊ីលប្រឆាំង​យន្តហោះ​ណាមួយ ត្រូវបានបញ្ជូន​ទៅអ៊ុយក្រែននោះឡើយ ចាប់តាំងពីឆ្នាំ១៩៩១»។ ការបញ្ជាក់បែបនេះមានន័យថា ការដែលចោទរុស្ស៊ីថា ជាអ្នកបាញ់ទម្លាក់ MH17 ដោយប្រើប្រាស់​មីស៊ីល Buk នោះ​គឺជារឿង​ដែលមិនត្រឹមត្រូវ​នោះឡើយ។

គួរបញ្ជាក់ថា ក្រុមអ្នកស៊ើប​​អង្កេតអន្តរជាតិ ដឹកនាំដោយ​ប្រទេសហូឡង់​​បានឱ្យដឹងថា មីស៊ីល​​ប្រភេទ Buk ដែលត្រូវបាន​គេ​ប្រើប្រាស់ ដើម្បីបាញ់ទម្លាក់ជើង​​ហោះហើរ MH17 របស់ក្រុមហ៊ុន​​អាកាសចរណ៍​​ម៉ាឡេស៊ី​អ៊ែរ​ឡាញ កាលពីជិត ០៤ឆ្នាំមុន គឺមាន​ប្រភព​មក​ពីមូលដ្ឋានយោធា​ក្នុងទឹកដី​រុស្ស៊ី។

យោងតាម​លោក វាលប៊ឺត ផូលីសសិន (Wilbert Paulissen) មកពី​ស្ថាប័នប៉ូលិស​ជាតិហូឡង់ មីស៊ីលខាង​លើ​មានប្រភពមក​ពីកងអង្គភាព​មីស៊ីលប្រឆាំង យន្ដហោះ​លេខរៀងទី ៥៣ នៃយោធារុស្ស៊ី​ស្ថិតនៅក្នុង​ទីក្រុងឃើសក៍ (Kursk)។ ប៉ុន្តែ ការលើកឡើង​របស់លោក Paulissen ធ្វើឡើងដោយ​ផ្អែក លើការបង្ហាញ​លទ្ធផលបឋម​ នៃការស៊ើបអង្កេ​តដ៏យូរជុំវិញការបាញ់​ទម្លាក់យន្ដហោះ MH17 តែប៉ុណ្ណោះ ខណៈរុស្ស៊ីកន្លងមកបាន​ច្រានចោល​​រាល់​ការចោទ​ប្រកាន់មក​លើខ្លួន។

គួររំលឹកថា យន្ដហោះ MH17 ត្រូវបានគេបាញ់​ទម្លាក់នៅឯតំបន់ ដូណិត (Donetsk) នៃភាគខាងកើត​​ប្រទេសអ៊ុយក្រែន កាលពីថ្ងៃទី១៧ ខែកក្កដា ឆ្នាំ២០១៤ ដោយផ្ដាច់យក​ជីវិតមនុស្ស នៅ​លើយន្ដហោះនេះ​ទាំងអស់ ២៩៨នាក់ ក្នុងនោះភាគច្រើន​អ្នកដំណើរ​ជាជនជាតិ​ហូឡង់៕