(ម៉ាឡេស៊ី)៖ លើទឹកដីនៃរដ្ឋ Kelantan ប្រទេសម៉ាឡេស៊ី លោក​ឧកញ៉ា អូស្មាន ហាស្សាន់ រដ្ឋមន្រ្តីប្រតិភូអមនាយករដ្ឋមន្ត្រី អញ្ជើញជួបសំណេះសំណាល សាកសួរសុខទុក្ខ និង​រៀបចំពិធីពិសាអាហារស្រាយបួសរ៉ាម៉ាឌន ជាមួយស្ថាបនិក គណៈកម្មការ និង​សិស្សមជ្ឈមណ្ឌលអប់រំឥស្លាម PPI Kota Bahru រដ្ឋ Kelantan ដែលមានចំងាយ​៤៥០​គីឡូម៉ែត ពីទីក្រុងគូឡាឡាំពួរ។​

លោកសាស្ត្រាចារ្យ មូសា សាឡេះ ​បានជម្រាបពីសាវតានៃមជ្ឈមណ្ឌលនេះថា ជាថ្នាលបណ្តុះបណ្តាលកូនខ្មែរតែមួយគត់ ដែលកសាងនៅឆ្នាំ​១៩៨៧ ហើយដំណើរការឆ្នាំ​១៩៩០ ជាគំនិត្យផ្តួចផ្តើម និងកសាងដោយ​កូនខ្មែរ ២រូប គឺរូបលោក និង​សាច់ញាតិម្នាក់ទៀត ហើយមជ្ឈមណ្ឌលនេះ ជាថ្នាលបណ្តុះបណ្តាល ដែលទទួលសិស្សខ្មែរឥស្លាម ដែលមករស់នៅសិក្សាបំប៉នចំណេះដឹង មុននឹងទៅប្រលងប្រជែងជាមួយសាលារដ្ឋម៉ាឡេស៊ី។

មកដល់បច្ចុប្បន្ន មជ្ឈមណ្ឌលសម្រេចបានការបណ្តុះបណ្តាលធនធានមនុស្ស មិនតិចជាង​១,០០០នាក់ ដែលបានបញ្ចប់ការសិក្សាពីម៉ាឡេស៊ី និងបណ្តាប្រទេសផ្សេងៗ ហើយក្លាយជាបញ្ញវ័ន្ត សាស្ត្រាចារ្យ បណ្ឌិត អ្នកជំនួញ បុគ្គលិកក្រុមហ៊ុនឯកជន និង​ស្ថាប័នរដ្ឋ។​

ដោយពិនិត្យមើលឃើញពីសភាពចាស់ទ្រុឌទ្រោម របស់មណ្ឌលអប់រំដែលចំណាស់មួយនេះ លោក អូស្មាន ហាស្សាន់ បានជម្រាបដល់ គណៈគ្រប់គ្រងមជ្ឈមណ្ឌលថា លោក​នឹងព្យាយាម ដោះស្រាយគ្រប់នីតិវិធី ដើម្បីធ្វើការអភិវឌ្ឍន៍មជ្ឈមណ្ឌលប្រវត្តិសាស្រ្តមួយនេះ ឲ្យបានល្អប្រសើរ តាំងពីអាគារសិក្សា ការិយាល័យរដ្ឋបាល និងកម្រិតស្តង់ដារអប់រំជាដើម។

លោកក៏បានកោតសរសើរដល់ស្ថាបនិក និង​គណៈកម្មការទាំងអស់ ដែលបានពលី​តស៊ូ ដើម្បីកូនខ្មែរ បង្កើតបានជាថ្នាលបណ្តុះបណ្តាលធនធានមនុស្ស មួយយ៉ាងសំខាន់ និង​មានសារៈប្រយោជន៍បំផុត ដល់សង្គមជាតិកម្ពុជាទាំងមូល៕